Alaska
| |||
.svg)
| |||
Alaska es un stato en la parte estrema norde-ueste de la Statos Unida de America. Lo es bordada a la este par Columbia Brites e Yukon (divides dirijal de Canada), sua parte la plu ueste es Isola Attu, a lo ave un frontera maral con Rusia a la ueste ultra la Streta Bering. A la norde es la Mar Txucotca e la Mar Beaufort – la partes sude de la Mar Artica. La Mar Pasifica es a la sude e sude-ueste.
Par area, lo es la stato la plu grande de la SUA e la numero sete de la divides sunasional de mundo. En ajunta, de la 50 Statos Unida, lo es la plu rara poplada e la numero tre de la min popladas; an tal, lo es clar la teritorio la plu poplada a norde de latitude 60° en America Norde: sua popla (de cual la Census Bureau de la SUA ia estima sua cuantia como 738 432 persones en 2015) es plu ca la cuatruple de la poplas combinada de Canada Norde e Calalitnunat. Sirca un dui de la abitores de Alaska abita en Anchorage, un area urban.
La economia de Alaska es dominada par la industrias de pexa, gas natural e petrolio, recursos de cual lo ave un abunda. Bases militar e turisme es ance un parte importante de la economia.
La Statos Unida ia compra Alaska de la Impero Rusce a 30 marto 1867 per 7,2 milion dolares SUA, a taso de sirca 2 sentimes per acre ($4,74/km²). La rejion ia pasa tra alga cambias dirijal ante deveni organizada como un teritorio a 11 maio 1912. On ia aseta lo como la stato 49 de la SUA a 3 janero 1959.
La site capital es Juneau.
Etimolojia
editaLa nom "Alaska" (rusce: Аляска Aliaska) ia es introduida en la periodo colonial rusce cuando on ia usa lo per refere a la penisola. Lo ia es derivada de un idiom aleut cual descrive metafor la tera xef de Alaska. Leteral, lo sinifia "ojeto a cual la ata de la mar es dirijeda".
Poplas orijinal
editaMulte poplas orijinal ia ocupa Alaska tra miles de anios ante la ariva de popla european en la area. Studias de lingua e adn asi ia furni atestas per la coloni de America Norde par la ponte natural de Beringia.
La popla tlingit ia developa un sosia con un sistem matrilinal de desende e erita de propria en lo cual es oji Alaska sude-este, e ance en partes de Columbia Brites e Yukon. Ance en la sude-este ia es la popla haida, aora bon conoseda per sua artes unica. La popla tsimsian ia veni a Alaska de Columbia Brites en 1887, cuando Presidente Grover Cleveland ia permete ce los abita la Isola Annette e fundi la vila Metlakatla.
Tota tre de esta poplas, como ance otra poplas orijinal de la costa norde-ueste de la Mar Pasifica, ia sufri erutas de variola de la tarda de la sentenio 18 asta la media de la sentenio 19. La epidemicas la plu sever ia aveni en la desenios de 1830 e 1860, causante multe moris e turba sosial.