Angusa pos trauma

La sindrom de angusa pos trauma es un maladia mental cual pote developa pos un person ia esperia un aveni traumosa, como un ataca sesal, gera, colidas de veculos, o otra menasas a la vive de un person. Sintomes pote inclui pensas, emosias, o sonias relatada a la avenis, angusa o turba fisical cuando esperiante stimulas relatada, cambias en la modos en cual un person pensa o senti, o un aumenta en la respondes de combate o fuji. Esta sintomes dura un mense o plu pos la aveni. Enfantes con esta sindrom ave un risca plu grande per suiside o autoferi. Lo es plu comun en femes ca omes, e plu comun en gera. Grupos cual sufri plu probable de la sindrom inclui enfantes en familias cual sufri de viole, vitimes de trafica umana, enfantes ci ia sufri molesta, omes ci ia sufri tortura en gera, soldatos ci ia esperia matas multiple, femes ci ia esperia viole sesal, e refujadas.

Los Desatres de la Guerra un de 80 imajes par Francisco Goya

La plu de persones ci ia esperia un aveni traumal no ta developa angusa pos trauma. Persones ci esperia un trauma interpersonal (per esemplo viole sesal o maltrata en enfantia) ave plu risca de developa la sindrom, comparada a persones ci esperia traumas cual no envolve un ataca, como acasos o desastres natural. Sirca dui de persones developa la sindrom pos viole sesal. Enfantes es min probable ca adultes per developa la sindrom pos trauma, spesial si los es su la eda de 10. Diagnose es fundida sur la presente de sintomes spesifada seguente la aveni.

Preveni pote es posible cuando consela es dirijeda a los con sintomes temprana ma no es efetosa cuando furnida a tota persones incluinte e con e sin sintomes. La tratas major es psicoterapia e medisines. Antidepresantes, spesial un inibinte spesifada de recatura de serotonina (ISRS, en engles SSRI) es medisines usada prima e benefia sirca dui de persones. Lo no es clar si la usa de medisines con psicoterapia ta benefia plu o no. Otra medisines no ave evidentes sufisinte per suporta sua usa, e lo pare ce benzodiazepina e alcol pote mali resultas.

Sintomes de angusa pos trauma ia es trovada de la eda de la elinicas antica. En la Geras Mundal, la sindrom ia es conoseda du nomes variosa, como "neurose de combata", engles shell shock (xoca de cartux), e franses obusite ("-ite" de fratos de bombas). La terma "sindrom de angusa pos trauma" o simil ia entra la vocabula en la desenio de 1970, cuando multe veteranes de la Gera de Vietnam ia es diagnoseda con la sindrom. Lo ia es reconoseda par la Asosia de Psiciatria American en 1980.