Antoine de Saint-Exupéry
Antoine de Saint-Exupéry ("antwan de sent-egzuperí", 29 junio 1900–31 julio 1944) ia es un scrivor e avionor franses. El es famosa per sua noveleta La prinse peti, e ance bon conoseda per sua libros sur aventuras de avioni, cual inclui Vola de note e Tera de omes.
El ia es un pilote susedosa ante la Gera Mundal Du: el ia junta se a la Armada de Aira franses a la comensa de la gera, e ia vola en misiones de oserva asta la sesaspara con Deutxland. Pos un periodo de scrive en la SUA, el ia junta se a la Armada Franses Libre. El ia deveni perdeda en un vola de oserva supra la Mar Mediteraneo en julio 1944.
Anios temprana edita
Antoine Jean-Baptiste Marie Roger de Saint Exupéry ia nase en Lyon a un familia vea de nobilia provinsal, como la enfante tre entre sinco de Marie de Fonscolombe e Viseconte Jean de Saint-Exupéry, un ajente de securia ci ia mori ante cuando sia fio ia ave an cuatro anios. (Testos legal, cual inclui sua article de nase, mostra no ifen en sua nom de familia. Ma la ifen apare en sua nom de scrivor.)
Pos fali en sua esaminas final a sua scola preparante, Saint Exupéry ia entra a la Scola de Artes Bela per studia la arciteta. En 1921, el ia comensa sua servi militar con la Rejimento Du de Xasores (cavalores lejera armada), e a pos on ia envia el a Strasbourg per instrui el como un pilote de avion. En la anio seguente, el ia oteni sua lisensa, e on ia ofre move el a la Armada de Aira. Ma cuando la familia de sua fem prometeda (la novelor futur Louise Leveque de Vilmorin) ia oposa, en loca el ia comensa abita en Paris e ia es empleada en un ofisia. An tal, la duple ia abandona ultima sua promete de sposi, e Saint Exupéry ia labora sin susede en otra postos diversa tra alga anios seguente.
Ma ja en 1926, el ia vola denova. El ia deveni un de la abrivias de la posta airal internasional, en un tempo cuando aviones ia ave poca strumentos. A pos, el ia cexa ce los ci ia vola la aviones plu avansada ia deveni plu simil a contores ca pilotes. El ia labora per la compania Aéropostale entre Toulouse e Dakar.
Carera de scrivor edita
La nara prima de Saint Exupéry, La avionor, ia es publicida en la jornal La barcon de arjento. En 1929, el ia publici sua libro prima, Posta sude; sua carera de avionor ia crese ance rapida, e en acel mesma anio el ia vola la via entre Casablanca e Dakar. El ia deveni la dirijor de Cape Jubby, un campo de avion en Río de Oro, Maroco. Ance en 1929, el ia comensa abita en Arjentina, do on ia nomi el la dirijor de la compania arjentina de posta airal. On esplora corta esta periodo de sua vive en Alas de coraje, un filma IMAX par la dirijor franses Jean-Jacques Annaud.
En 1931, Vola de note – la prima de sua obras major, e la ganiante de la Prix Femina – ia es publicida, e Saint Exupéry ia deveni famosa. La libro trata sua esperias con la posta airal. En acel mesma anio, a Grasse, el ia sposi Consuelo Suncin (naseda como Suncín Sandoval), un scrivor e artiste salvadoran viduida. La uni ia es tempestosa, car Antoine ia viaja frecuente e ia adultera multe – la plu notable con un fem franses, Hélène (Nelly) de Vogüé, ci ia deveni la esecutor leteratural de Antoine pos sua mori e, su la nom "Pierre Chevrier", ia scrive ance un biografia de el.
Cade en deserto edita
A 14:45 de 30 desembre 1935, pos un vola de 19 oras e 38 minutos, Saint Exupéry e sua navigor André Prévot ia cade en la parte libi de la deserto Sahara, cisa en Wadi Natrun. La ecipo ia atenta vola de Paris a Saigon plu rapida ca cualce avionor presedente, per un premio de 150 000 frances.
Ambos ia survive la atera, ma los ia fronti la posiblia de desidrata rapida en la Sahara. Los ia ave no idea de sua loca. En sua raconta Tera de omes, Saint Exupéry ia dise ce sua sola furnis ia es uvas, du oranias, e un cuantia peti de vino; ma a jornalistes pronto pos sua salva, el ia dise ce los ia ave sola un termos de cafe dulse, alga xocolada, e poca biscotos, sufisinte per susta los per un dia. Los ia alusina par oio e orea; en la dia tre, los ia es tan desidratada ce los ia sesa sua. Final, en la dia cuatro, un badaui sur camel ia descovre los e ia salva sua vives.
La fable La prinse peti comensa con un pilote abandonada en un deserto, e es un refere partal a esta esperia.
Abita en America Norde edita
Saint Exupéry ia continua scrive e vola asta la comensa de la Gera Mundal Du. En la gera, el ia vola inisial un Bloch MB.170 con la scuadron de la Armada de Aira. Pos la sesaspara entre Frans e Deutxland en 1940, el ia viaja a la Statos Unida. El e se sposa ia abita un suteto lusosa a 240 Central Park South en la Site New York e un cason luada en Asharoken a la costa norde de Long Island entre janero 1941 e april 1943, e ance en la Site Quebec per un periodo en 1942.
El ia scrive La prinse peti en Asharoken entre la media e la fini de 1942; la manoscrito ia es ja completida en otobre.
Desapare en vola edita
Pos cuasi dudes-sinco menses en America Norde, el ia reveni a Europa per vola con la Armada Franses Libre e combate con la Aliadas Ueste en un scadron con base mediteraneo. Con 43 anios, el ia es plu vea ca la plu de omes asiniada a tal labora; e sua multe rompes de oso ia dole multe el. On ia asinia el con alga otra pilotes a aviones P-38 Lightning, cual un ofisior ia descrive como "aviones fatigada par gera, no secur per vola".
La asinia final de Saint Exupéry ia es colie informas sur la moves de la plotones deutx en e sirca la Vale de la Rhone, en prepara per la invade de Frans sude par la Aliadas. En la sera de 31 julio 1944, el ia parti de un campo de avion sur Corse, e on ia revide nunca el. Un fem ia reporta ce el oserva la cade de un avion sirca mediadia a la prima de agosto, prosima a la Baia de Carqueiranne asta Toulon. Pos alga dias, on ia trova un corpo nonidentifiable ma vestida en colores franses, e on ia entera el en Carqueiranne en acel setembre.
Confirmas resente edita
En 1998, Jean-Claude Bianco, un pexor, ia trova un brasaleta de arjento cual porta la nomes de Saint Exupéry, sua sposa, e sua editores (Reynal e Hitchcock). La brasaleta ia es oncida a un peso de stofa, suposable de la vestes de la avionor.
En 2000, Luc Vanrell, un sumerjor, ia trova un avion P-38 Lightning cadeda a fondo de la mar a costa de Marseille. On ia regania la restas de la avion en otobre 2003. A 7 april 2004, investigores de la Departe Franses de Arceolojia su Acua ia confirma ce la avion es vera lo de Saint Exupéry. On no ia trova bucos fusilida, ma sola un parte peti de la avion ia es reganiada. En junio 2004, on ia dona la fratos a la Museo de Aira e Spasio en Le Bourget.
La loca de la cade e la brasaleta ia es a un distantia min ca 80 cilometres par mar de do on ia trova la soldato franses nonidentifiable en Carqueiranne, e lo es ancora credable (ma no confirmada) ce la corpo ia es portada a ala par corentes de mar en la dias pos la cade.
En marto 2008, Horst Rippert, un om con 85 anios ci ia es un pilote de la Armada de Aira deutx, ia anunsia ce el ia cade un avion P-38 Lightning a 31 julio 1944 en lacel area. An tal, fontes contempora, cual inclui sinias intersepida de la Armada de Aira deutx, sujesta forte ce Saint-Exupéry no ia cade par causa de fusili par un avion deutx; e los conteni no reporta ce Rippert ia cade un Lightning a acel dia.
Onoras edita
- On onora Saint Exupéry con un placa en la Pantheon de Paris.
- Asta cuando on ia introdui la euro en Frans en 2002, sua testa e sua desinia de la Prinse Peti ia apare sur la bileta de 50 frances.
- En 2000, on ia renomi la Airoporto Lyon Satolas como la Airoporto Lyon–Saint Exupéry.
- El ave un monumento en Tarfaya, Magrib.
- Un asteroide porta la nom 2578 Saint-Exupéry.
Obras leteratural edita
An si los no es sever autobiografial, multe de la obras de Saint Exupéry ia es inspirada par sua esperias como pilote. Un eseta es La prinse peti, un nara poesial cual el mesma ia ilustra, en cual un pilote abandonada en la deserto encontra un prinse joven ci veni de un asteroide pico. La prinse peti es un nara filosofial, cual critica la sosia e comenta sur la strania de la mundo adulte.
- La avionor (L'Aviateur, 1926)
- Posta sude (Courrier Sud, 1929)
- Vola de note (Vol de Nuit, 1931)
- Tera de omes (Terre des Hommes, 1939)
- Pilote de gera (Pilote de Guerre, 1942)
- La prinse peti (Le Petit Prince, 1943)
- Letera a un ostaje (Lettre à un Otage, 1944)
- Fortres de site (Citadelle, 1948)
- Leteras de jovenia (Lettres de jeunesse, 1953)
- Folios (Carnets, 1953)
- Leteras a sua madre (Lettres à sa mère, 1955)
- Scrives de gera (Écrits de guerre, 1982)
- Manon, un dansor (Manon, danseuse, 2007)
- Leteras a la nonconoseda (Lettres à l'inconnue, 2008)
Pos cuando Saint Exupéry ia desapare, sua sposa Consuelo ia scrive La nara de la rosa, publicida en 2000.
En 2000, Jean-Pierre de Villers ia scrive un noveleta cual imajina la nara de la vola final de Saint Exupéry, La vol final de la prinse peti.
Lias esterna edita
- Wikimedia Commons – fotos de stradas e canales