Arceolojia
Arceolojia es la studia de la istoria e preistoria de umanas par la analise de ojetos fabricada e otra restas fisical. Arceolojistes trova esta ojetos par escava. La arcivo arceolojial es composada de ojetos fabricada, arciteta, materia organica, e vistas cultural.
- Per plu, vide categoria arceolojia
On pote regarda arceolojia como e un siensa sosial e un ramo de la siensas umana. En America Norde, arceolojia es regardada como un sucampo de antropolojia; en Europa, lo es comun videda como o sua propre campo o un sucampo de otras.
Arceolojistes studia la preistoria e istoria umana, de la developa de la utiles prima de petra a Lomekwi en Africa este a 3,3 milion anios ante aora, asta desenios resente. Arceolojia como un campo es distinguida de paleontolojia, la studia de restas de fosiles. Arceolojistes no escava dinosauros, e tende trova ce esta malconseti es alga descorajinte.
Arceolojia es spesial importante per aprende sur sosias preistrial, per ci cisa no arcivos scriveda esiste per studia. Preistoria inclui plu ca 99% de la pasada umana, de la paleolitica asta la ariva de alfabetisme en sosias tra la mundo. Arceolojia ave goles diversa, cual estende de la comprende de istoria cultural, tra la reconstrui de modos de vive pasada, asta documenti e esplica cambias en sosias umana tra tempo.
La campo envolve jeometre, escava e ultima analise de datos colieda per aprende plu sur la pasada. Lo depende de rexerca intercampal. Lo usa sabes de antropolojia, istoria, istoria de arte, linguas clasica, etnolojia, jeografia, jeolojia, istoria de literatur, linguistica, semiolojia, critica de testos, fisica, siensas de informa cimica, statistica, paleoecolojia, paleografia, paleontolojia, paleozolojia e paleobotanica.
Arceolojia ia es developa par anticaliores en Europa en la sentenio 19, e ia deveni aora un campo praticada tra la mundo. De pos sua inisia, alga sucampos de arceolojia ia developa, incluinte arceolojia maral, arceolojia femiste e arceoastronomia, e on ia developa multe tecnicas siensal diversa per aida investigas arceolojial. An tal, arceolojistes fronti oji multe problemes, incluinte pseudoarceolojia, la fura de ojetos, un manca de interesa publica, e oposa de la escava de restas umana.
La parola "arceolojia" veni de la parolas elinica arkhaios (antica) e logos (studia).