Arciteta de pueblos antica
La cultur de la Pueblos Antica es posible la plu bon conoseda per la abitadas de petra e tera ce la popla ia construi longo la mures de falesas, spesial en la periodos de pueblo 2 e pueblo 3, de sirca 900 a 1350 ec. La esemplos la plu bon conservada de estas es aora protejeda en parces o monumentos nasional de la SUA sude-ueste.
(Estas inclui Navajo National Monument, Chaco Culture National Historical Park, Mesa Verde National Park, Canyons of the Ancients National Monument, Aztec Ruins National Monument, Bandelier National Monument, Hovenweep National Monument, e Canyon de Chelly National Monument.)
Esta vilas, nomida pueblos par la colonistes espaniol, ia es asedable sola par cordas o par trepa la falesas. Esta atenis de construi stonante ia ave comensas umil. La abitadas e vilas prima de la pueblos antica ia es fundida sur casas de cavetas, un cualia comun en la periodos de la fabrica de sestos.
La popla de la pueblos antica ia crea un arciteta unica, con spasios desiniada per la comunia. La sentros antica, como la Canion de Chaco, Mesa Verde, e la Monumento nasional Bandelier, ia dona fama a la pueblos antica. Los ia es composada de strutures semblante apartes fabricada de petra, arjila de adobe, e otra materiales local, o ia es siselida en la lados de la mures de caniones. Developada en esta cultures, la popla ia ance adota detalias de desinia de otra cultures tan distante como Mexico contempora.
En sua periodo, esta vilas antica ia es tipal construidas multinivel e multiusa ensircante plazas abrida e basines de vista. Los ia es abitada par sentos a miles de persones. Esta complesos ia ospita avenis cultural e munisipal e un infrastrutur cual ia suporta un rejion vasta a estra de sentos de cilometres a via, liada par ruas de transporta.
Construida multe ante 1492 ec, cuando la europeanes ia entra la Americas, es vilas de la pueblos antica ia es en locas cual ofre bon defende, per esemplo su mesas alta e presipe como los a Mesa Verde o la Pueblo Acoma (con la nometa "site de sielo") en Mexico Nova. Plu temprana ca 900 ec e progresante ultra la sentenio 13, la complesos ia es sentros major per la popla. En la Canion de Chaco, la developores ia escava blocos de arenito e trae lenio de distantias grande per asembla 15 complesos. Estas ia es la construidas la plu grande en America Norde asta la sentenio 19 tarda.
Indicas de arceoastronomia a Chaco ia es sujestada, con la petroglifo de la daga de sol a Fajada Butte un esemplo popular. Multe construidas a Chaco ia pote es aliniada per catura la sicles solal e lunal, cual ia nesesa jeneras de oservas astronomial e sentenios de construi destrosa e coordinada. Cambias de clima es un esplica per la migra de la popla de Chaco e la abandona ultima de la canion, comensante con un secia de 50 anios cual ia comensa en 1130.
Complesos enorme, conoseda como la "casas grande", es la locas de relijio a Chaco. Arceolojistes ia trova strumentos musical, joalas, seramicas, e cosas ritual, cual sujeste ce la persones ci ia abita esta casas ia es familias elite e plu rica. Los ia ospita enteras en casa, do donadas ia es enterada con la mor, comun incluinte boles de comedas e perletas de turcesa.
An con la formas arcitetal ia evolui e la sentenios ia pasa, la casas ia reteni alga cualias cor. La plu evidente es sua masa; la complesos ia ave promedia plu ca 200 sales per cada, e alga ia enclui asta 700 salas. Salas individua ia es grande, con sofitos plu alta ca la obras de la pueblos antica de periodos a ante. Los ia es bon desiniada: sesiones o alas vasta ia es completida en un fase, e no en grados peti.
La casas ia fasa jenera a la sude. Plazas ia es cuasi sempre ensircada per construidas de salas cluida o mures alta. Casas ia ave comun cuatro o sinco niveles, con salas de un nivel fasante la plaza; blocos de salas ia es terazida per permete ce la partes plu alta per composa la construida posterior. Salas ia es frecuente organizada como suites, con salas a fronte plu grande ca los a pos, interna, e la salas o areas de reserva.
Strutures ritual, conoseda como civas, ia es construida en proportio a la cuantia de salas en la pueblo. Un civa peti ia es construida per sirca cada 29 salas. Nove complesos ia ospita cada un Civa Grande, cada ta multe como 19 metres en diameter. Portos en la forma de T e linteles de petra ia marca tota civas de Chacoa.
An si mures simple e composada ia es comun usada, casas grande ia es construida xef de mures cor-e-xapa: du mures paralel per suporta la sofito composada de blocos plata cortida de arenito, liada con mortero de arjila ia es construida prima. La spasios entre la mures ia es plenida con detrito, forminte la cor de la mur. La mures ia es alora covreda con un xapa de pesos peti de arenito, cual ia es presada en un strato de fango liante. Esta rocas peti ia es comun poneda en motifes distinguinte.
La strutures en Chaco ia nesesa la lenio de sirca 200,000 coniferes, la plu de los traeda, par pede, de montanias asta 110 km distante.
Tra la rejion de Pueblos Antica, e a Mesa Verde, la loca la plu bon conoseda per sua cuantia de abitadas a presipes bon conservada, casas e complesos de defende e conserva ia es construida en cavas basa e su estendes de petra longo la mures de la canion. La strutures contenida en esta alcovas ia es tipal construida de blocos de arenito dur, liada con lunlotra e jesida con mortero de adobe.
Construis spesifada ia ave multe similes, ma ia es jeneral unica en forma, resultante de la topografia individua de la alcovas diferente longo la mures de la canion. Contrastante con la construidas e vilas plu temprana a la culmina de la mesas, la abitadas en falesas a Masa Verde ia refleta un tenda tra la rejion en la sentenio 13, a un agrega de popla cresente en un vila intima e bon defendable.
Forma comun en la arciteta, incluinte civas, tores, e casas en cavetas, es incluida en esta area, ma la constrinjes de spasio de esta alcovas ia resulta en un consentra multe plu densa de sua abitores. Mug House, un vila falesal tipal de la periodo, ia es casa per sirca 100 persones ci ia comparti 94 salas peti e 8 civas, construida un contatante la otra e comparti multe de sua mures. Construores de esta areas ia usa masima la spasio en cualce modo los pote, e no areas ia es considereda como proibida a construi.
No tota persones en la rejion ia vive en abitadas de falesas; multe ia coloni la bordas e inclinas de la canion en strutures multifamilial cual ia crese a grandias no videda a ante como la cuantia de popla ia infla. Motifes de decora per esta construis de arenito e mortero, ambos los a la falesas e no ala, inclui la fenetras e portes con acel forma T. Esta ia es videda par alga arceolojistes como indicas de la estende continuante de la sistem de elites de la Canion de Chaco, cual ia pare es colasada sirca un sentenio a ante. Otra rexercores vide esta motifes como un parte de un stilo plu jeneral e con sinifia spirital, e no como indicas de un sistem sosioeconomial de un elite spesifada.
Un aspeta multe notable de la infrastrutur de la Pueblos Antica es la Vias de Chaco, un sistem de ruas cual radia de la multe locas de casas grande como Pueblo Bonito, Chetro Ketl, e Una Vida. Los ia condui a locas peti e cosas natural spesial en e ultra la canion.
Par la usa de imajes de satelites e investigas a tera, arceolojistes ia deteta a min oto ruas major cual core, en tota, plu ce 300 km, e es plu ca 10 metres larga. Estas ia es escavada en un surfas lisa e plana en la roca madral, o creada par estra la plantas e solo. La abitores de Canion de Chaco ia siseli rampas e scaleras grande en la falesa per lia la ruas a la culminas de la crestas a la locas a la fondas de la vales. La rua la plu longa e la plu bon conoseda es la Rua Norde Grande, cual orijina de ruas diferente prosima a Pueblo Bonito e Chetro Ketl. Esta ruas converje a Pueblo Alto e de ala vade a norde de la limitas de la canion. No comunias es longo la curso de la ruas, estra alga strutures peti e isolida.