Arciteta gotica
La arciteta gotica es un stilo de arciteta cual ia flori en Europa en la eda medieval alta e tarda. Lo ia evolui de la arciteta romanica e ia es segueda par la arciteta de la Renase. Lo ia orijina en Frans en la sentenio 12 e ia dura asta la sentenio 16. En acel periodo, la arciteta gotica ia es conoseda como Opus Francigenum ("labora franses"); la terma "gotica" ia es prima usada en la ultima parte de la Renase. Sua cualias inclui la arco puntida, la volta costelin e la arco apoiante. La arciteta gotica es la plu conoseda como la arciteta de multe catedrales, abaderias e eglesas de Europa. Lo es ance la arciteta de multe casteles, palasios, ofisias de site, salones de sindicato, universias e, en un estende min importante, abiterias privada.
La stilo gotica ia es plu potiosa espresada en la eglesas grande, catedrales e alga construidas sivil. Sua cualias apela a emosias, cual fonti de fida o de orgulo sivil. Un cuantia grande de construidas eglesal resta de esta periodo, de cual an la plu petis es frecuente strutures de importa arcitetal, e multe de la eglesas grande es regardada como obras de arte nonestimable e es listada par UNESCO como Locas de Erita Mundal. Par causa de esta, la studia de la arciteta gotica es frecuente la studia de catedrales e eglesas.
Alga series de revives gotica ia comensa en la dui de la sentenio 18 en England. Los ia estende en la sentenio 19 a Europa e ia continua, xef per strutures eglesas e universias, a la sentenio 20.
Defini
editaDe la studias de la sentenio 18, multe ia atenta defini la stilo gotica usante un lista de cualias tipal, xef con la arco puntida, la volta suportada par arcos crusante, e la arco apoiante.
Como un stilo arcitetal, la gotica ia developa xef en arciteta eglesal, e sua prinsipes e formas tipal ia es aplicada a otra tipos de construidas. Construidas de tota tipos ia es construida en stilo gotica, e atestas resta de palasios, construidas sivil, murones de site, pontes, eglesas parocial, abaderias e catedrales.
La plu de construidas gotica survivente es eglesas. Estas varia de eglesetas peti a catedrales grande, ma an si multe ia es estendeda e cambiada en stilos diversa, un cuantia grande resta o sustantial intata o alga restorada, mostrante la forma, carater, e decora de arciteta gotica. La stilo gotica es la plu asosiada con la catedrales grande de la norde de Frans, Nederland, England e Espania, con otra esemplos tra Europa.
A fini, la istoristes ia crea un lista de esta cualias cual ia es stranjer a la artes medieval temprana e clasica cual inclui pinaculos e frontones entre otras. Alga combinas de estas ia es rejetada per representa stilos rejional o nasional de gotica o per segue la evolui de la stilo. De estas eticetas ia emerji como "perpendicular engles" par causa de la oserva de composantes como traseria. Esta idea, nomida "composante" par Paul Frankl, ia aveni a scrivores de la sentenio 19 como Arcisse de Caumont, Robert Willis e Frans Mertens.
Istoria
editaLa stilo gotica ia orijina en la rejion Ile-de-France en la eda romanica e la dui prima de la sentenio 12 en la catedral de Sens (1130–62) e la abaderia de San Denis (s 1130–40 e 1140–44), e no ia sustitui direta per lo. Un esemplo de la manca de un separa clar es la flori de la romanica tarda (deutx: Spätromanisch) en la Santa Impero Roman su la Hohenstaufenes e longo la Rio Reno; la stilo gotica ia estende a England e Frans en la sentenio 12.
Tradision romanica
editaEn la sentenio 12, la arciteta romanica, nomida "gotica normande" en England, ia es stablida tra Europa e ia furni la formas e unias arcitetal fundal cual ia resta evoluinte tra la eda medieval. La categorias importante de construida – la catedral, la eglesa parocial, la monceria, la castel, la casa de garda, e monumento sivil – ia es fundida en la periodo romanica.
Multe cualias arcitetal cual ia es asosiada con la arciteta gotica ia es developada e usada par la arcitetores de construidas romanica, ma no completa esplotada. Estas inclui la voltas costelin, la contrafortes e la fenetras colorida. Esta cualias, pd la volta costelin e la arco puntida, ia es usada de la sentenio 11 en Italia sude, Durham e Picardia.
Lo ia es xef la introdui vasta de un sola cualia, la arco puntida, cual ia trae la cambia cual separa la gotica de la romanica. La cambia tecnolojial ia permete un cambia stilal cual ia rompe la tradision de construis de petra masosa e murones solida penetrada par fenetras abris, sustituinte per lo un stilo do la lus pare vinse contra la materia. Con sua usa, on ia developa multe otra trucos arcitetal, ja probada en un pico de construidas e usada a pos per segue la esijes strutural, estetical e ideolojial de la stilo nova. Esta ia inclui la arcos apoiante, pinaculos e traserias cual es tipal de la arciteta eglesal gotica.
Cambia de arciteta romanica a gotica
editaLa arciteta gotica no ia emerji de un tradision romanica morinte, ma de un stilo romanica en la apico de sua popularia, e lo ia sustitui per lo per multe anios. Esta cambia en stilo, comensante en la media de la sentenio 12, ia apare en un ambiente de multe developa inteletal e political cuando la Eglesa Catolica ia comensa deveni un strutur political multe potiosa. Un otra cambia fada par la stilo gotica ia es la move de la moncerias campanial de la romanica a la ambiente urban con eglesas gotica nova construida en sites rica par eglesores nonsecular ci ia conose multe bon la unia e potia cresente de la Eglesa. La cualias cual defini la arciteta gotica ia developa de la arciteta romanica e ia developa en locas jeografial diversa, como resulta de influes e nesesas strutural diferente. La voltas crusada es tipal de la arciteta romanica, e la voltas costelin ia es usada en multe eglesas romanica tarda. La esemplos prima de la volta costelin, sur murones de eglesas romanica, ia apare a la mesma tempo en England e Normandia en la Catedral de Durham (de 1093 a ante 1110), Winchester, Peterborough e Gloucester, la coro de la abaderia de Lessay, e la Eglesa de San Paulo en Rouen.
La orna jeometrial portada par la moldidas de alga de esta voltas atesta la desira de plu decora, e esta ia es plu tarda respondeda par arcitetores laborante en Ile-de-France, Valois e Vexin. Projetas franses plu tarda, de 1125 a 1135, mostra voltas plu lejera con un profil singular o duple convesa e mures plu magra. La abaderia de Notre Dame de Morienval en Valois es un esemplo de esta, con voltas covrente sirca un pasaje per pasea, suportas plu lejera e voltas cual ia es copiada en la Catedral de Sens e en la Basilica de Suger en San Denis. An si la arcitetores normande ia partisipa ance en esta developa, la romanica en la Santa Impero Roman e Lombardia ia resta la mesma con sola poca esperimenta con voltas. Du plu cualias de la romanica normande – la contrafortes e la murones de casca duple a la altia de fenetra – ia ave un rol plu tarda en la nase de la arciteta gotica. Esta muron duple, un modo conveninte de ateni la fenetras, ia ave un coredor de spasio resiclida cual ia apare prima en la traversales de la abaderias de Bernay e Jumièges sirca 1040–50. Esta coredor a la altia de fenetra ia dona la ilude de lejeria completa, ia inspira la catedral de Noyon, e ia afeta la forma intera de arte gotica.
Bibliografia
edita- Fletcher, Banister; Cruickshank, Dan, Sir Banister Fletcher's a History of Architecture, Architectural Press, 20th edition, 1996 (first published 1896). 0-7506-2267-9. Cf. Part Two, Chapter 14.
- Rudolph,Conrad ed., A Companion to Medieval Art: Romanesque and Gothic in Northern Europe, 2nd ed. (2016)
- Tonazzi, Pascal (2007) Florilège de Notre-Dame de Paris (anthologie), Editions Arléa, Paris, 2-86959-795-9