En la mitolojia elinica e roman, un arpia ia es un monstro con testa de fem e corpo, alas e garas de avia xasante. Lo ia es un personi de ventas de tempesta en la poesias de Homero.

Artistes ia representa jeneral los como avias con testa de xica, fases pal de famia, e garas longa sur sua manos. Autores roman e bizantian ia detalia sua feia. Ma arte seramica ia presenta la arpias como femes bela con alas. Ovidio ia descrive los como vultures umana.

Funsionas e abitada edita

Lo pare ce la arpias ia es orijinal spiritos de venta – personis de la natur destruinte de venta. Sua nom en elinica (ἅρπυια harpyia) sinifia "saisores" o "furores rapida". Los fura comeda de sua vitimes cuando estas es comente, e porta persones vil (spesial los ci ia mata sua familia) a la Furias.

Cuando un person ia desapare subita de la tera, on ia dise ce la arpias ia porta el a via. En esta modo, los ia saisi la fias de re Pandareo e ia dona los a la Furias como servores.

En esta forma, los ia es ajentes de puni ci ia saisi persones e ia tortura los en via a Tartaro. Los ia cruel e violente.

La arpias ia es descriveda como "la canes de Zeus potiosa" e "ministros de la Tonor (Zeus)". Autores plu tarda ia lista la arpias entre la gardores de la sumundo, entre otra monstros incluinte la sentauros, Scila, Briareo, la idra de Lerna, la cimera, la gorgones e Gerion.

Los ia abita o la isolas nomida Strofades, o un loca a la entra de Orco, o un cava en Criti.

Argonautas edita

La nara la plu famosa en cual la arpias apare es esta: Zeus ia fa ce Re Fineo de Tracia deveni capas de predise la futur. Ma, coler ce Fineo ia revela un scema secreta de la dio, Zeus ia puni el par sieci el e pone el sur un isola con comedas cual el ia pote nunca come, car la arpias ia ariva sempre per fura lo.

Esta ia continua asta la ariva de Jason e la Argonautas. Fineo ia promete ce el ta instrui los sur sua curso de naviga, si los ta libri el de la arpias. La boreades, fios de la venta norde, ia susede forsa la arpias a via. La boreades ia es a punto de mata la arpias cuando Iris o Hermes ia apare e ia comanda ce la vinsores libri la arpias, prometente ce los no va disturba plu Fineo.