Arte deco

Arte deco es un stilo de arte e arciteta cual ia comensa en Paris en la desenio de 1920, e cual ia flori tra la desenio de 1930 e la eda de la Gera Mundal Du. La stilo ia influe tota areas de desinia, incluinte arciteta, la desinia de internas, desinia industrial, moda e joalas, depinta, artes grafica, e filma. La espresa "arte deco" ia deveni poplal pos un esibi en Paris en 1966 (Les Années 25: Art Deco) cual ia selebra un esibi en 1925 (Exposition Internationale des Arts Décoratifs et Industriels Modernes) cual ia es la culmina de stilo moderna en Paris. A sua plu bon, arte deco ia representa sofistica, encanta, usosia, e modernia.

La construida Chrysler en New York, construida entre 1928 e 1930.

En la desenio 1930, en la Grande Depresa, la stilo Arte Deco ia deveni plu vinseda. Materiales nova ia ariva, incluinte placas de cromo, aser nonosidinte e plastica. Un forma de esta stilo, nomida Streamline Moderne, ia apare en esta desenio, e lo ia distingui formas curva e surfases plana e briliante. Arte Deco es un de la stilos vera internasional, ma sua importa ia fini en la comensa de la Gera Mundal Du e la asende de stilos de modernisme funsional e la Stilo Internasional de arciteta cual ia segue.

La rascasielos american ia marca la apico de la stilo Arte Deco, los ia deveni la construidas moderna plu alta e reconosable en la mundo. Los ia es desiniada per mostra la prestijia de sua construores tra sua altia, forma, color e lumina a note. La rascasielos de New York, la construida Woolworth, en un stilo neoclasica, ia es completida en 1913.