Asosia Internasional de Fonetica
La Asosia Internasional de Fonetica (engles: International Phonetic Association; franses: Association phonétique international; corti: API) es un organiza cual promove la studia de fonetica e la aplicas pratical variosa de acel siensa. La contribui major a fontica es la Alfabeta Fonetical Internasional (API; AFI en lfn), un norma per la representa de tota linguas. La API publici ance la Jornal de la Asosia Internasional de Fonetica, e organiza la Congresa Internasional de Siensas Fonetica cada anio cuatro, tra sua organiza sorin, la Consilia Permane per la ICPhS.
En 1886, un grupo peti de enseniores de linguas en Paris ia formi un asosia per coraji la usa de un sistem de scrive fonetica en scolas per aida enfantes en la developa de pronunsias de linguas stranjer e ance per aida en instrui leje a enfantes joven. La grupo, conduida par Paul Passy, ia nomi se inisial Dhi Fonètik Tîtcerz' Asóciécon (la FTA; un forma cuasi fonetica de la engles the phonetic teachers' association, pd la asosia de enseniores de fonetica). En janero 1889, la nomi ia es cambiada a L'Association Phonétique des Professeurs de Langues Vivantes (AP), e en 1897 a L'Association phonétique internationale (API). La culmina de la cuantia de membros e influe sur otra grupos en educa ia es sirca 1914, cuando lo ia ave 1751 membros en 40 nasiones. La Gera Mundal 1 e sua seguentes ia disturba la ativias de la asosia, e la jornal no ia recomensa asta 1922.
La intende orijinal ia es per crea un grupo de simboles fonetica a cual espresas diferente ta pote aplica, como cada lingua ta ave un alfabeta spesial conveninte per descrive la sonas de la lingua. Ultima, lo ia deside ce un alfabeta universal, con la mesma simbol usada per la mesma sona en linguas diferente, ta es la ideal, e la developa de la AFI ia progresa rapida. Plu resente, on ia ave alga cambias a la alfabeta, con ajuntas e sutraes cual ia es indicada par la progresa de la siensa de fonetica.
La organiza ia dona esaminas en fonetica de 1908, donante notas de valida en la foneticas de engles, franses, o deutx.
Vide la article Alfabeta Fonetical Internasional per plu.