Atena

Atena, acc Pallas Athena (Παλλάς Ἀθηνᾶ), ia es un diva elinica antica, asosiada con sabia, artisania, e gera. Plu tarde, el ia es sinteseda con la diva roman, Minerva. Atena ia es videda como la sponsor e protejor de sites variosa en Elas, spesial la site de Atina, de cual el ia reseta probable sua nom. El ia es tipal imajida como portante un elmo e teninte un lansa. Sua simboles major inclui buos, olivos, serpentes, e la Gorgoneion (Γοργόνειον), joalas majiosa con la fas de la Gorgon.

La sculta de Atena a la Museo Louvre en Paris; un copia roman de la sentenio prima, de un orijinal elinica de la sentenio 4 aec

La Partenon en Atina, dedicada a Atena

De sua orijin como un diva de palasios ejean, Atena ia es asosiada forte con la site. Alga de sua nomes, como Polias e Poliouchos ia deriva de "polis" (πόλις), cual sinifia "site-stato". Sua templos ia es xef locada sur un Acropolis, un colina fortida en la sentro de un site. La Partenon sur la Acropolis de Atina es dedicada a el, con multe otra templos e monumentos. Como la sponsor de artisanes e tesores, Atena ia ave ance la nom Atena Ergane ("a la fronte de la armada"). Como un diva-geror, el ia es crededa como gidante soldatas a batalia, su la nom Athena Promachos (Ἀθηνᾶ Πρόμαχος). Sua festa xef en Atina, la Panathenaia (Παναθήναια), ia es selebrada en la mense de Hekatombaion (Ἑκατομβαιών) en media de estate, e ia es la festa la plu importante en la calendario de Atina.

En mitolojia elinica, Atena ia nase de la testa de sua padre Zeus. En la mito de la funda de Atina, Atena ia gania supra Poseidon, en un compete sur la sponsoria de la site, par crea la olivo prima. El ia es ance conoseda como Athena Parthenos (Ἀθηνᾶ Παρθένος, "Atena la virjin"), ma, en un mito atica antica, la dio Hefesto, dio de forjores, ia atenta viole el ma ia fali, cual ia resulta en Gaia ("Tera") pari Re Erictonio, un eroe importante per la funda de Atina. Atena ia es la diva-sponsor de atentas eroin. El ia es crededa como ance aidante la eroes Perseo, Hercule, Belerefonte, e Iason. Con Afrodite e Hera, Atena ia es un de la tre divas de ci sua disputa ia resulta en la comensa de la Gera Troian. El ia ave un rol ativa en la Iliada, en cual el aida la aceanes e, en la Odisea, el es la conselor divin per Odiseo. En alga naras, Atena ia es descriveda como la madre de la Coribantes (dansores-soldatos) par Helio ("Sol").

Pos la Renase, Atena ia deveni un simbol internasional de sabia, la artes, e educa clasica. Artistes e alegoristes de Europa ia usa el frecuente como la simbol de libria e democratia.