Baobab
La baobab es un jenero (Adansonia) de arbores caduca. Los abita la rejiones seca de Madagasicara, Africa, Arabia, e Australia. La nom es de arabi ʾabū ḥibāb, cual sinifia "la padre de multe semes".
En la sentenio 21 temprana, la baobabes en Africa sude ia comensa mori rapida de un causa no ancora conoseda. Siensistes crede ce lo no es probable ce maladias o pestas ta pote mata tan multe arbores tan rapida, e alga sujesta ce la mori ia es la resulta de desidrata de caldi global.
Baobabes pote ateni altias de 5 a 30 m e ave perimetres de 7 a 11 m. La baobab Glencoe, un baobab en la provinse Limpopo en Sudafrica, ia es posible la plu grande, con un perimetre de 47 m e un diametre de 15.9 m.
La arbores produi anelos de crese apena persepable, probable anial, ma los no es sufisinte dependable per estima la eda de individuas, car los es difisil per conta e pote desapare cuando la lenio vei. Dati radiocarbonal ia es usada sur alga individuas, e la baobab Panke en Zimbabue ia ave alga 2450 anios cuando lo ia mori en 2011, la anjiosperma la plu vea sempre notada.
Baobabes reteni acua en sua troncos (asta 120,000 litres) per dura ambientes de secia sever. Tota baobabes abita areas cual seci par saison, e los perde sua folias en la saison seca.
La frutas ave un casco veludin e es sirca la grandia de un coco, de sirca 1.5 kg, ma no es tan globin. La fruta fresca ave la sabor, suposada, de un sorbete. La semes de alga spesies es un fonte de olio vejetal.