Abri la menu xef
Spinoza

Baruch Spinoza (24 novembre 1632 a 21 febrero 1677) ia es un filosofiste iudi-nederlandes de un sefardi-portuges orijin. Par construi la funda per la Lumina e critica biblial moderne, incluinte consetas moderne de la person e la universo, el ia deveni un de la razonalistes de filosofia de la sentenio 17. Con Rene Descartes, Spinoza ia es un filosofiste xef de la Eda de Oro de Nederland. Sua nom personal, cual sinifia "bondiseda", varia entre linguas diferente. En Ivri, lo es scriveda como ברוך שפינוזה. Sua nom portuges es Benedito "Bento" de Espinoza. En sua obras latina, el usada latina: Benedictus de Spinoza. Tra la edas, el ia es tan amirada ce tota reconose el par la nom "Spinoza".

Spinoza ia es elevada en un comunia portuges-iudi en Amsterdam. El ia developa ideas multe controversal regardante la autenticia de la Biblia ivri e la natur de la divin. Autorias iudi ia proclama un herem (חרם, "condena") contra el, cual causa ce el ia es espulsada e escluida par la sosia iudi a 23 anios, incluinte par sua propre familia. Sua libros ia es plu tarde ajuntada a la Catalogo de Libros Proibida par la Eglesa Catolica. El ia es nomida un ateiste par sua contemporas, an si Spinoza ia refuta nunca la esiste de Dio. Lo es comun videda como un panteiste, cual no es distante de la veria.

Spinoza ia vive un vive esterna simple como un fabricor de lentes otical, colaborante sur lentes per microscopios e telescopios con Constantijn e Christiaan Huygens. El ia refusa premios e onores tra sua vive, incluinte postos prestijiosa de instrui. El ia mori a 44 anios de un maladia de la pulmones, posible tuberculose o silicose, malida par la enspira de polvo pico de vitro cuando molente lentes. El ia es enterada en la semetero cristian de la Nieuwe Kerk ("eglesa nova") en de Haag, Nederland.

La obra mestral de Spinoza, la Etica, ia es publicada pos sua mori en la anio de sua mori. La obra ia oposa la filosofia de Descartes de dualisme de mente e corpo, e ia resulta en Spinoza gania la titulo de un de filosofistes european la plu importante. Georg Wilhelm Friedrich Hegel ia dise "La fato es ce Spinoza es fada un punto de proba en filosofia moderne, afin lo pote es diseda: Tu es o un spinoziste o no un filosofiste" Sua atenis filosofial e sua carater moral condui Gilles Deleuze per nomi el "la prinse de filosofistes".

Vide anceEdita