Baxni (rusce: ба́шни, tores) es un varia de dama, conoseda en Rusia de la sentenio 19. Lo segue la regulas fundal de damas rusce, con la difere major ce pesos caturada no es sutraeda de la table, ma es poneda su la peso caturante, cual resulta en un "tore". Esta tores move como un peso, obedinte la state de la peso plu alta. Cuando un tore es saltada, sola la peso plu alta es sutraeda de la colona e deveni un parte de la colona caturante.

Un esemplo de baxni

La descrive prima de baxni ia es en un article "Tores" en la "Colie de juas per familia e scola", composada par Valerian Alexandrovich Viskovatov, e publicida en 1875 en San Peterburg.

Regulas edita

Table: Baxni es juada sur un table de 8 x 8 con cuadro alternante oscur e pal.

Comensa: Ambos juor comensa con 12 pesos sur la tre linias plu prosima a sua lado. La lino la plu prosima es nomida la "linia de res". La juor con la blanca (o plu pal) pesos comensa.

Pesos: On ave du tipos de pesos: "omes" e "res". Ambos pote es un peso singular o un colona. Res es difereda par usa de pesos normal de la mesma color a la alta de un colona.

Omes: Omes move a ante diagonal a un cuadro nonocupada visina.

Res: Si un peso move a la linia de res a la lado de la oposor, acel peso deveni un re. La peso aora ave la capasia per move diagonal a ante e a retro. Si un peso toca la linia de res en un catura e pote continua un catura, lo pote salta como un re. La juor pote eleje do el resta pos la catura.

Catura: Si un cuadro visina conteni un peso de la oposor, e la cuadro direta pos lo e vacuida, la peso de la oposor pote es caturada e poneda su la peso cual ia salta supra lo, cual crea un colona. Si on salta un colona, sola la peso a la culmina de la colona e caturada, e la resta de la colona resta. La color de la peso aora a la culmina indica la posesor de la colon. On pote catura a ante o a retro. Saltas de catura pote continua en a mesma modo. Un catura es obligada e no pote es refusada. Ma on pote eleje cual segue on vole usa, e no nesesa la segue cual resulta en la cuantia la plu grande de caturas. An tal, si on eleje un segue, on pote completa la segue de caturas.

Colona: La colona move como un om si la peso alta es un om, e move como un re si la peso alta es un re. Sola la peso a alta deveni un re.

Gania: Un juor con no move valida restante perde la jua. Lo es la caso si la juor ave no pesos libre o si la pesos es prevenida de move par la pesos de sua oposor. La jua es egal (pd nun gania) si la mesma posa repete se per un ves tre, con la mesma juor avente la move cada ves.