Blackadder

Blackadder ("Vipera negra") es un comedia televisada de situas istorial, produida en Britan par la BBC como cuatro series de ses episodios. On ia crea ance tre episodios spesial. La serie prima ia es scriveda par Richard Curtis e Rowan Atkinson. La resta ia es scriveda par Curtis e Ben Elton.

En tota episodios, Rowan Atkinson prende la rol de la antieroe Edmund Blackadder, a lado de Tony Robinson en la rol de Baldrick, sua servor de casa. Cada serie es situada en un periodo istorial diferente, e la du carateres xef es sempre la desendentes de sua corespondentes en la serie presedente. Tra la series, Edmund deveni un lecabota sempre plu intelijente e rusosa, an cuando Baldrick deveni plu e plu stupida.

La serie prima es situada en la anio 1485, en un mundo alternativa do Re Richard 3 ia vinse en la Batalia de Bosworth Field, ma ia es acaso matada a pos. Sua fio ia deveni alora Re Richard 4, de ci Edmund es la fio du e nonfavoreda.

La serie du aveni en la rena de Rea Elizabeth 1, presentada par la ator Miranda Richardson como un person con un mente multe enfantin en un corte plen de persones bizara. Edmund es un om de corte ci atenta resta en la favore de la Rea.

La serie tre es situada a la fini de la sentenio 18. Edmund labora como la servor xef de George 4 (ci es ancora mera la Prinse de Cimri, ma rena en loca de sua padre malada). George es presentada par Hugh Laurie como un fol estravagante.

La serie cuatro aveni en 1917, a la Fronte Ueste, en la fosos de la Gera Mundal Prima, do Edmund es un capitan. El usa sua intelijentia per scemi modos de evita mori. Ma en un sena final seria, el e tota la otra carateres xef es obligada a emerji de sua foso – e los mori futil en la tera de nun.

En un broma comun, un carater (tipal Edmund) insulta un person o un situa en un stilo estrema parolosa e inventosa. Per esemplo:

Edmund

Baldrick, tua serebro es simil a la Bestia Pex-Eglefin de Aberdeen cual ave cuatro testas e come persones.

Baldrick

En cual modo?

Edmund

Lo no esiste.