Buenos Aires
Buenos Aires (en espaniol: [ˈbwenos ˈai̯ɾes]) es la site capital e la site la plu poplada de Arjentina, e un de la sites la plu grande en la mundo. Lo es situada a la lado ueste de la estuario de la rio Plata, en la costa sude-este de America Sude, e comparti sua dialeto de espaniol con Montevideo, capital de Uruguai, cual es situada a la otra lado de la rio. "Buenos aires" pote es traduida a "bon ventas" o "bon airas", ma la prima de estas ia es la sinifia cual la fundores ia intende en la sentenio 16, par usa de la nom orijinal "Real de Nuestra Señora Santa María del Buen Ayre". La urbe continuante de Grande Buenos Aires, cual ance inclui alga distritos de la provinse de Buenos Aires, constitui la area urban la cuatro de la plu poplada en America, con sirca 17 milion abitores.
La site de Buenos Aires no es un parte de la provinse de Buenos Aires; la site es un distrito autonom. En 1880, pos desenios de batalia political, Buenos Aires ia es federalida e ia es sutraeda de la provinse de Buenos Aires. La limitas de la site ia es grandida per inclui la vilas de Belgrano e Flores, ambos de cual es aora visinerias de la site. La cambia de la constitui en 1944 ia dona autonomia a la site, de asi sua nom formal: Ciudad Autónoma de Buenos Aires (Site Autonom de Buenos Aires). La sitadanes de la site eleje prima un xef de governa (pd un maior) en 1996; a ante, la presidente de la republica ia asinia direta la maior.
La site es la capital de la tango, cual ave sua jergo propre, nomida lunfardo. Lunfardo es un misca de espaniol con parolas portuges e italian.