Bulion es un licuida preparada de acua en cual osos, carne, o vejetales ia es bolida lente. Lo pote es comeda sin otra ajuntas, ma lo es la plu comun usada per prepara otra platos, como sopas e salsas. Oji, on pote compra bulion licuida prepreparada, tipal de gal, bove, pex, o vejetales. cubos de bulion desiderada ia comensa es vendeda en la sentenio 20 temprana.

Un bulion simple de gal
La prepara de bulion per pho bo, un sopa viet
Un consommé duple de gal

Tradisional, bulion ia es preparada par usa osos de animales cual es bolida en un casola per estrae la sabor e nurintes. La osos pote ave o no ave carne ancora sur los. Osos rostada es usada per ajunta un color plu osur e un sabor plu caramelida.

Un mirepoix (franses: misca), tipal un misca de carota, onion, e seleri (e, en alga varias, peperon, alio, poro, o tomate es ajuntada, o sustituida per un de la otra ingredientes), es comun ajuntada a la osos o carne, e en bulion vejetal. La tre ingredientes orijinal es comun nomida "la trinia santa".

Per clari la bulion, la blancas de ovos es a veses ajuntada en coce; los va coagula cuando los fri, trapante deponedas en un masa fasil tamisida. Un bulion rica e clarida es nomida un consommé (franses).

Bulion en cosini franses

Bulion franses es videda como esensal per bon cosini en Frans. On ave multe varias: la court-bouillon (bulion per poxe), la bouillon de légumes (vejetales), la bouillon de volaille (aves), la bouillon de racines (radises), la bouillon d'os (bove), la bouillon de viande (carne jeneral), la bouillon de poisson (pex), e la consummé.

Bulion en cosini italian

En la termes de cosini, coce comeda en un bulion densa pote es nomida un umido o un guazzatto, per esemplo: lenticchie (lentiles) o vongole (bivalvos) en umido o guazzeto (ragu).

Bulion en cosini japanes

La tipo de bulion cual es usada como un funda en cosini japanes es nomida dashi, de cual on ave multe varias: alges, xampiniones, e pexes pote entra sua composa.