Calendario de Mundo
La Calendario de Mundo es un calendario en cual la dias de semana es sempre la mesma en cada anio.
Lo ia es introduida en 1930 par Elisabeth Achelis, ci ia fundi la Asosia de Calendario de Mundo a 21 otobre 1930. La promove ia gania suporta internasional asta cuando la Gera Mundal Du ia interompe la discute sivil. Pos la gera, la idea ia es reintroduida a la Nasiones Unida, ma la adota ia es parada par la SUA en 1955. Politicistes american no ia vole ofende poplas relijiosa conserviste, ci ia es turbada par la idea ce, a un ves per anio, on va ave un plu dia en la semana, o oto dias entre un soldi e la seguente – desacordante con la costum biblial. La organiza ia move a Ottawa e ia deveni la Asosia Internasional de Calendario de Mundo. Triste, la impedi ia frustra la membros de la organiza. Aora, con la interede, on ave ancora un promove, an si peti, per adota la Calendario de Mundo.
La Calendario de Mundo ave 12 menses, divideda en cuatro cuatris. Cada cuatri comensa con soldi e un mense de 31 dias. Cada mense de 31 dias es segueda par du menses de 30 dias. A la fini de la anio, un plu dia es ajuntada afin la anio ave 365 dias. Esta dia es nomida la Dia de Mundo e no ave un nom como la otra dias de la semana; lo es un festa internasional como la sera ante la anio nova. En cada anio cuatro, un plu dia es ajuntada a junio. Ance esta dia no ave un nom e es un festa internasional.
| Sol | Lun | Mar | Mer | Jov | Ven | Sat |
|---|---|---|---|---|---|---|
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 |
| Sol | Lun | Mar | Mer | Jov | Ven | Sat |
|---|---|---|---|---|---|---|
| 1 | 2 | 3 | 4 | |||
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 |
| Sol | Lun | Mar | Mer | Jov | Ven | Sat |
|---|---|---|---|---|---|---|
| 1 | 2 | |||||
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| * |
- * Nota: La Dia de Mundo segue 30 desembre, e la Dia 366 segue 30 junio en cada anio cuatro.
La Calendario de Mundo ta dona a nos un calendario con cambias minima a nosa modo de esperia semanas, menses e anios; plu, lo ta dona cuatro saisones o cuatris con la mesma cuantia de dias – un aida per comersia. Triste, on ave ance un resiste potiosa a ideas simple e razonal como esta. La razona xef contra la calendario es ce alga cristianes, iudistes e muslimes no gusta la rompe de la semana creada par la Dia de Mundo.
Un varia an plu simil a la calendario presente funsiona como esta: Fa sola ce desembre 31 (e febrero 29, en anios estendeda) no ave un dia de semana asiniada a lo. Lo ta es la Dia de Mundo. La resta de la calendario resta esata la mesma. Studiantes joven ta debe ancora recorda la longia variosa de la menses, e la cuatris de la anio no ta ave esata la mesma cuantia de dias, ma nun ta debe perde sua aniversario (estra los ci ia nase a febrero 29). Si on prefere, on pote fa ce janero 1 es la Dia de Mundo – la resulta ta es la mesma.