Candidose
Candidiase es un infeta fungal de cualce tipo de candida, un fermento. La areas la plu comun envolveda es la boca e garga e la vajina. Sintomes inclui pesos blanca sur la lingua o otra partes de la boca e garga, dole, e problemes engola. Cuando lo afeta la vajina, la sintomes inclui pruri de la area, la sensa de arde, e a veses un suda de la vajina cual pare simil a ceso blanca. Infetas de la penis es min comun e sintomes es tipal un eruta prurinte. Rara, infetas par fermento pote deveni invadente, sperdente a otra partes de la corpo. Esta pote resulta en febres en ajunta a la otra sintomes, dependente a la partes envolveda.
Plu ca 20 tipos de candida pote causa infeta, con candida albicans como la plu comun. Infetas de la boca es plu comun en enfantes de min ca un mensa, la vea, e los ci ave sistemes imunal debil. Problemes cual resulta en un sistem imunal inclui VIU, sida, medicas usada pos transplanta de organos, diabete, e la usa de corticosteroides. Otra riscas inclui un prostese dental e terapia antimicrobial. Infetas de la vajina aveni plu comun en ensinta, en los con sistemes imunal debil, e seguente usa de antimicrobiales. Persones con un risca de candidose invadente inclui bebes de basa pesa, persones en unias de cura intense, e los con sistemes imunal perilida.
Atentas per preveni infetas de la boca inclui la lava de boca con clorexidin per los con imunia debil, e la lava de la boca seguente usa de steroides enspira. No multe evidentia suporta la usa de probioticas per preveni o trata an entre los con infetas vajinal frecuente. Per infetas de la boca, trata con clotrimazol surfasal o niastatin es comun efetiva. Fluconazol, itraconazol, o amfoterisin B par boca o intravenal pote es usada si los no aida. Alga medisines surfasal antifungal pote es usada per infetas vajinal, inclui clotrimazol. En los con un infeta sperdeda, un ecinocandin como caspofungin o micafungin es usada. Un cuantia de semanas de amfoterisin B intravenal pote es usada como un alternativa. En alga grupos con alta risca, medisines antifungal pote es usada per preveni.
Infetas de la boca aveni en sirca 6% de bebes con min ca un mensa. Sirca 20% de los resetante cemoterapia per canser e 20% de los con sida ance developa la maladia. Sirca 75% de femes ave a min un infeta en sua vive. Maladia sperdeda es rara estra los ci ave fatores de risca.