Canion Grande
La Canion Grande (hopi: Ongtupqa;[2] iavapai: Wi:kaʼi:la, navaho: Tsékooh Hatsoh, espaniol: Gran Cañón) es un canion con falesas presipe siselida par la Rio Colorado en Arizona, SUA. Lo es 446 km en longia, a masima 29 km larga, e ateni un profundia de 1857 m.
La canion e la borda visin es contenida en la Parce Nasional de la Canion Grande, la Foresta Nasional Kaibab, la Monumento Nasional de Canion Grande - Parashant, la Reserva de Hualapai, la Reserva de la Havasupai, e la Nasion Navaho. Presidente Theodore Roosevelt ia es un promovor major per la conserva de la area, e ia visita lo a multe veses per xasa e joia la vistas.
Cuasi du bilion anios de la istoria jeolojial de Tera ia es esposada en cuando la Rio Colorado e sua afluentes ia talia sua canales tra strato pos strato de roca, en cuando la plano alta Colorado ia es levada. Lo es estimada ce la rio ia comensa sua curso tra la area sirca sinco a ses milion anios ante aora. De esta tempo, la rio ia propulsa la talia par la afluentes e la retira de la falesas, profundi e largi simultan la canion.
Per miles de anios, la area ia es abitada continuante par americanes orijinal, ci ia construi colonias en a canion e sua multe cavas. La popla pueblo vide la Canion Grande como un loca santa, e peregrina a lo. La european ci ia vide prima la canion ia es Garcia Lopez de Cardenas de Espania, ci ia ariva en 1540.