La carboniferosa es un sistem e periodo jeolojial cual estende 60 milion anios de la fini de la periodo devonian 358.9 milion anios ante aora a la comensa de la periodo permian, 298.9 milion anion ante aora. La nom sinifia "porta carbono" en latina.

La artopleuro, un miriapodo jigante
La euripterido megarache ia semble un aracnido grande
La meganeuro, un inseto enorme
La pederpo, un tetrapodo primitiva
La hilonomo, la retil sauropsido la plu temprana
La arceotiro, un sinapsido multe temprana

Fundida sur un studia de la ordina de rocas brites, lo ia es la prima de la nomes moderna usada per sistemes, e refleta la fato ce multe letos de carbon ia es formida global en acel eda. La carboniferosa es comun tratada en America Norde como composada de du periodos jeolojial: la Mississippian plu temprana e la Pennsyvanian plu tarda. Animales teran ia es bon fundida per la carbinoferosa. Amfibios ia es la vertebratos teran la plu dominante, de cual un ramo ia evolui ultima a amniotos, la vertebratos sola teran prima.

Artropodos ia es ance comun, e multe (como la meganeuro) ia es multe plu grande ca los de oji. Rejiones vasta de foresta ia covre la tera, cual ia deveni ultima la letos de carbon cual marca la stratigrafia de la carboniferosa oji. La cuantia alta de osijen en la atmosfera ia ateni sua masima en esta periodo - 35% comparada con 21% oji, cual ia permete ce nonvertebratos ia evolui a un grandia grande.

La dui plu tarda de la periodo ia esperia glasias, un nivel basa de mares, e la erije de montes cuando la continentes ia colide per forma la supracontinente Pangea. Un aveni minor de estingui de animales de mar e tera ia aveni a la fini de la periodo, nomida la colasa de la foresta pluvosa carboniferosa, causada par un cambia de clima.

Nonvertebratos de acua dulse ia inclui bivalvos e crustaseos diversa. La euripteridos ia es ance diversa. En la carboniferosa tarda, insetos, miriapodos, e aracnidos ia aveni. Artropodos ia crese a grandias enorme, como la artropleuro milipedin, cual ia es tan longa como 2.6 m, e la meganeuro libelin, con un estende de alias de 75 cm.

Pexes ia es ance comun, con la elasmobrancos (selacos e sua relativas) dominante. Amfibios ia es tan longa como 6 m, e los plen teran ia developa pel scalosa. Un de la inovas de evolui en la carboniferosa ia es la ovo de amniotos - la retiles - cual ia permete la pone de ovos en un ambiente seca. Estas inclui la sauropsidos la plu temprana conoseda, e la sinapsidos la plu temprana conoseda - retiles lezardin cual ia es la asendentes de multe retiles, avias, e mamales.