Cat Stevens
Yusuf Islam (naseda como Steven Demetre Georgiou a 21 Julio 1948 en London, England) ia presenta musica su la nom Cat Stevens de 1966 a 1978. El es un musiciste, cantor, scrivor de cantas, instruor, filantropiste, e convertida a Islam.
.png)
En la comensa de sua carera musical, el ia adota la nom Cat Stevens, e ia vende plu ca 60 milion albumes tra la mundo. Sua albumes la plu notable es Tea for the Tillerman, Teaser and the Firecat, e Catch Bull at Four. Sua cantas la plu popular es "Morning Has Broken", "Peace Train", "Moonshadow", "Wild World", "Father and Son", "O Caritas", "If You Want to Sing Out, Sing Out", "Trouble", e "The First Cut is the Deepest". "The First Cut is the Deepest" ia gania du premios de ASCAP per el.
Stevens ia converti a Islam en 1977, adotante la nom Yusuf Islam en 1978, e ia parti de sua carera musical per atende promoves de instrui e filantropia en la comunia muslim.
A un desenio a pos, un disputa ia aveni cuando el ia pare suporta un fatua cual ia esije la mori de autor Salman Rushdie. Plu tarda, el ia dise ce el ia es malcomprendeda.
Pos la atacas de 11 Setembre 2001 en New York e de 7 Julio 2005 en London, el ia condena forte la atacas e ia indica ce los no coere con la instruis de Islam. En 2004, on ia proibi ce el entra a la Statos Unida cuando sua nom ia apare en la lista de persones nonpermeteda a vola.
Yusuf Islam ia retorna a la mundo de musica pop en 2006, cuando el ia rejistra e presenta sua album prima de cantas nova pos 28 anios, nomida An Other Cup. El ia reseta premios diversa per sua laboras per pas en la mundo, incluinte la Om per Pas de 2004 e la Premio de Pas Mediteranean de 2007.
El abita aora con sua sposa Fauzia Mubarak Ali e sua sinco enfantes en London, e abita per un parte de cada anio en Dubai.