Cavalo de mar
Cavalo de mar es la nom de 45 spesies de pexes peti de mar en la jenero hipocampo (de elinica: "monstro de mar cavalin"). Con un testa e colo sujestante los de un cavalo, cavalos de mar ave ance armur sesionida, un posa vertical, e un coda risa e prensil.
Cavalos de mar es trovada xef en acua sal basa e tropical o temperada, tra la mundo de sirca 45º sude a 45º norde. Los abita areas protejeda como letos de erbas de mar, estuarios, resifes de coral, e rizoforas.
An ce los es pexes ososa, los no ave scamas. En loca, los ave pel magra estendeda supra un serie de platas ososa, cual es ordinada en anelos tra sua corpos. Cada spesies ave un cuantia unica de anelos. La armur de platas ososa proteje los ance contra predores. Car los ave esta sceleto esterna, los no ave costelas.
Cavalos de mar nada vertical, e propulsa se par usa la pina dorsal. La pinas petal locada a cada lado de la testo es usada per manobra. Los no ave la pina codal tipal de otra pexes. Sua coda pote sola es desclavida en situas multe estrema. Los es esperta a camofla con la capasia per crese e reasorbe protendes spinosa dependente de sua abitada. Plu, la cavalos de mar ave colos bon definida e flexable, contrastante con otra pexes.
Cavalos de mar nada debil, batetante rapida sua pina dorsal e usante sua pina petal (pos sua oios) per gida. Per esta razona, los es plu comun trovada restante con sua codas prensil enrolada sirca un ojeto stable. Los ave becos longa, cual los usa per suca sua comedas, e sua oios pote move autonom de lunlotra como los de un camaleon.
La mas ave un poxe a la lado ventral de la coda. Cuando cortea, la fema depone tan multe como 1500 ovos en la poxe de la mas. La mas porta la ovos per 9 a 45 dias asta la enfantes emerji, peti ma tota developada. La enfantes es alora relasada a la acua, e la mas comun cortea denova pos oras o dias en la saison de cortea.
Ante copula, cavalos de mar pote cortea per alga dias. Siensistes crede ce la condui sincroni la states de reprodui de la duple, afin la mas pote reseta la ovos cuando la fema es preparada per depone los. En esta tempo, los pote cambia color, nada lado a lado teninte codas o la mesma peso de erba con sua codas, e jira con lunlotra en cual es conoseda como la "dansa ante la lus prima". Ultima, los comensa un dansa "vera", cual dura sirca 8 oras, en cual la mas pompa acua tra sua pox, cual estende e abri per mostra sua vacuia.
Cuando la ovos de la fema ateni maturia, el e sua sposo relasa se de cualce ancores e flota a supra, beco a beco, de la erbas de mar, a veses spirali en leva. Los interata per sirca ses minutos en cortea. La fema alora nada a via asta la matina seguente, e la mas vade come. Cuando los reuni, la fema introdui sua ovoponador en la pox de la mas e depone deses a miles de ovos. En la intercambia, la corpo de la fema magri cuando lo de la mas infla. Alora ambos afonda en la erba de mar, e el nada a via.