Cocboroc (lingua)

Cocboroc (Kokborok) es la lingua nativa de la sirca un milion parlores de la popla borok, de la stato Indian Tripura e areas visina de Bangladex. La nom deriva de kok (lingua) e borok (umana). Lo es prosima relatada a la linguas bodo, dimasa, e catxari e la stato visina de Asam. Cocboroc es un de la linguas xino-tibetan de la ramo bodo-garo. La lingua ia es conoseda como tipra en edas pasada, con un cambia en cocboroc en la sentenio 20. La nomes aplica a la abitantes de la Rena Twipra pasada, e a la etnico de sua parlores

Enfantes tripuri

Cocboroc ave ses vocales: i, u, e, w, o, a. Eruditas temprana ia deside per usa la letera w como un simbol per un vocal simil a la i en engles pretty, pd alta e sentral. La u es usada per la sona w en la diftongos ua e uo.

Consonantes inclui:

• esplodantes: p, t, k; b, d, g; ph, th, kh (pd aspirada)
• africantes: ch (per lfn tx), j (per lfn dj)
• fricantes: s, h
• nasales: m, n, ng (como en bumerang, usada jeneral a la fini de un parola)
• licuidas: l, r

cocboroc ave du tonos: alta e basa. Per marca la tono alta, la letera h es poneda pos la vocal. Tono pote cambia la sinifia de un parola:

• lai - fasil; laih - crusada
• cha - coreta; chah - come
• nukhung - familia: nukhuhng - teto

La ordina de parolas en un frase es sujeto-verbo o sujeto-ojeto-verbo. Ajetivos segue la parolas cual los afeta. Parolas de demanda aveni en la loca en cual la responde ta aveni. Comandas ave la mesma ordina como un frase simple.

Nomes

Cocboroc ave du cuantias per nomes: singular e plural. La marca per plural es usada a la fini de la nom o pronom: rok e song. Los es sufisada a nom o a ajetivo cual segue la nom:

• bwrwirok - femes
• bwrwi naithokrok - femes bela

La lingua ave cuatro jeneros: mas, fema, comun, e neutre. Los pote es indicada en multe modos:

• Con parolas diferente:
  • bwsai - sposo; bihik - sposa
  • phayung - frate; hanok - sore
  • kiching - ami mas; mare - ami fema
• Par ajunta -i a la fini de la parola mas:
  • sikla - om joven; sikli - fem joven
  • achu - avo; achui - ava
  • (cuando la parola mas fini con -a, la -a es cadeda)
• Par ajunta -jwk a la fini de la parola mas:
  • bwsa - fio; bwsajwk - fia
  • kwra - padre par sposi; kwrajwk - madre par sposi

Parolas de la jenero comun pote ave sufisas como sa, chwla, jua per la mas, e ma, jwk, bwrwi per la fema:

• pun - capra; punjua - capra mas; punjwk - capra fema
• toc - gal; tokla - gal mas; tokma - gal fema
• takhum - sinie; takhumchwla - sinie mas; takhumbwrwi - sinie fema

Cocboroc ave ses casos, usada como sufisas a la fini de la nom o pronom:

• Nominativa - o
• Accusativa - no
• Strumental - bai
• Ablativa - ni
• Locativa - o
• Jenitiva - ni

Pronomes personal:

• ang - me; chwng - nos
• nwng -tu; mwngrok - vos
• bo (pronom mostrante) - el, lo; borok - los

Ajetivos

Ajetivos e verbos no es vera distinguida. som sinifa la ajetivo "negra" e la verbo "es negra".

Cocboroc comun usa parolas "ecosa", pd con duplida de silabas per indica cualias con diferes sutil:

• som kloklo - gris sombre;
• som chumuchumu - brun, como lenio vea;
• som plikplik - pel brun (natural);
• som sasa - un area vasta e sombre, como la sielo en un note sin stelas;
• som promprom - cualce cosa sombre en un fondo sombre; etc.

Verbos

Verbos es tipal segueda par un cuantia de sufisas, cual es poneda seguente regulas spesifada. La tipo prima indica si la prosede es distante o prosima, a alta o a basa.

• sosa - trae a supra; sokhlai - trae a su
• nai - regarda; nahar - regarda alga cosa distante

La tipo du dona informa sur ci fa cual: si algun fa alga cosa, o causa ce un otra fa alga cosa, o si alga cosa aveni sin nota par ci, o si persones fa alga cosa a lunlotra. La causativa usa -ri, la pasiva -jak, la resiproca -lai

La tipo tre dona informa sur tempo e modo: si on vole, si on debe, si on ia fa lo, si on intende fa lo:

• presente: -o
• presente negativa: -ya
• continuante: -wi tong (un forma de es)
• pasada: -kha
• pasada negativa: -khaya
• futur: -nai
• futur prosima: ano
• etc.

Per crea nomes/ajetivos de verbos, on prefisa kw-:

• rak - es dur; kwrak dur (e cosa dur)
• thwi - mori: kwthwi - mor (e person mor)

Un otra metodo crea ance esta nomes/ajetivos de verbo, con la sufisa -nai (o otra sufisas simil) Estas pote es usada en un modo simil a un proposa ajetivin en lfn:

• phainai bofok - la person ci veni (nota ce lo presede la nom e no segue lo, como ajetivos)

Fonte

Dr. Francois Jacquesson (2003). Kok-borok, a short analysis. https://halshs.archives-ouvertes.fr/halshs-00008042/document