Colite ulserosa

Colite ulserosa es un maladia de dura longa cual resulta con inflama e ulseras de la colon e reto. La sintomes major de la maladia ativa es dole adominal e diarea miscada con sangue. Redui de pesa, febre, e anemia pote ance aveni. Comun sintomes ariva lente e pote estende de lejera a sever. Sintomes aveni tipal periodal, con periodos de no sintomes entre ataca. Complicas pote inclui megacolon, inflama de la oio, juntas, o figato, e canser de la colon.

Un imaje endoscopial de un colon afetada par colite ulserosa; la surfas interna de la colon es descolorada e rompeda en alga locas.

La causa no es conoseda. Teorias inclui malfunsiona de la sistem imunal, jenetica, cambias de la bateria normal en la intestinos, e fatores ambiente. Frecuentias es plu alta en la mundo developada, con algas sujestente ce esta es la resulta de min esposa a infetas intestinal, o de la dieta e modo de vive de la mundo ueste. La estrae de la apendis en enfantia pote es protejente. Diagnose es tipal par colonoscopia con biopsias de texeda. Lo es un forma de maladia inflamante de la intestinos, como la maladia de Crohn e colite microscopial.

Cambias de la dieta pote boni la sintomes. Un varia de medisines es usada per trata sintomes e per promove remete, incluinte aminosalisilatos como mesalazin o sufaslazin, steroides, imunosupresantes como azatrioprin, e terapia biolojial. Estrae de la colon par sirurjia pote es nesesada si la maladia es sever, no responde a trata, o si complicas como canser developa.