Completinte

(Traduida de http://www.sil.org/linguistics/GlossaryOfLinguisticTerms/WhatIsAComplement.htm)

Tradisional, un completinte es un parte de un proposa cual es usada per ajunta un descrive a la sujeto o la ojeto de la proposa. Ave du varias:

• Un completinte sujetal es usada per ajunta un descrive de la sujeto. En linguas como elefen, engles, o espaniol, completintes sujetal es introduida par un copula como "es", "deveni", o "pare". Per esemplo:
  • Ambros ia es un bispo. (un completinte nomin)
  • Ambros ia es santa. (un completinte ajetival)
• Un completinte ojetal es usada per ajunta un descrive de la ojeto direta. Esetante per ojetos de la verbo "nomi", la sola esemplos posable en elefen es formulas de preposada, ma otra linguas permete ce los es ance nomes o ajetivos:
  • Los nomi el Ambros.
  • La popla ia eleje Ambros per bispo. (compara a la engles: "The people elected Ambrose bishop".)
  • La popla ia regarda Ambros como santa. (compara a la engles: "The people considered Ambrose holy".)

En gramatica jenerante, un completinte es diferente definida. El es un categoria de formula o proposa cual es sucategorida par la nucleo de la formula o proposa. Esta espresas es obligada, e los contrasta con "ajuntadas", cual es elejable. Per esemplo, la ojeto direta de un verbo transitiva es obligada e donce un completinte, ma un espresa averbal es jeneral elejable, e donce no un completinte. Ma la distingui no es sempre clar...

Esemplos:

• Robin ia leje la libro. (ojeto direta, completinte de la verbo)
• Robin ia dona el a me. (ojeto nondireta, completinte de la verbo)
• Erin ia pone el sur la scafal. (completinte de la verbo, obligada car on no pote dise "Erin ia pone el.")
• Esta problem pare multe difisil. (formula ajetival, completinte de la verbo)
• Los ia duta esce el ia es posable. (completinte frasal de la verbo)
• ...su la table. (formula nomin, completinte de la preposada)
• ...difisil per me comprende. (formula verbal, completinte de la ajetivo)

Nonesemplos:

• Nos ia sede rapida. ("rapida" es un alterante ajuntada a la formula verbal)
• Los va parti, me espeta. ("me espeta" es un proposa ajuntada a la frase intera)