Un cuarc es un particula pico cual composa protones e neutrones. La atom es composada de protones, neutrones, e eletrones. En la pasada, on ia crede ce protones, neutrones, e eletrones ia es particulos fundal, cual no pote es rompeda como cualce cosa plu pico. Pos la inventa de la aselerador de particulos, on ia descovre ce eletrones ia es particulos fundal, ma ce protones e neutrones no es fundal. Los es composada de cuarces, cual es liada par gluones.

Un imaje simple de un neutron, con du cuarces desendente ("D") e un asendente ("U")

On ave ses tipos de cuarces nomida "sabores": asendente, desendente, encanta, strana, alta, e basa. La plu de fisicistes usa la parolas engles (en la mesma ordina): up, down, charm, strange, top, bottom. La cuarces asendente, encanta, e alta ave un carga de +2/3, e desendente, strana, e basa ave un carga de -1/3. Cada cuarc ave un anticuarc corespondente. Anticuarces ave un carga oposante a lo de sua cuarces, cual es per dise ce asendente, encanta, e alta cuarces ave un carga de -2/3, e cuarces descendente, strana, e basa ave un carga de +1/3.

Sola cuarces asendente e desendente es trovada en atomes de materia normal. Du cuarces asendente e un descendente composa un proton (2/3 + 2/3 - 1/3 = +1 carga). Du cuarces desendente e un asendente composa un neutron (2/3 - 1/3 - 1/3 = 0 carga). La cuadro otra sabores no es natural trovada sur Tera, ma los pote es creada en aseleradores de particulos. Alga de los pote ance esiste en stelas.