Cuatro cavalores de la Apocalise

La cuatro cavalores de la Apocalise es descriveda en la libro final de la Atesta Nova de la Biblia, la Libro de Revelas par Joan de Patmos (o, algas crede, Joan la disiplo), capitol 6, como interpreteda par teolojistes de la Reformi Protestante. La capitol reporta de un libro en la mano destra de Dio cual es selida par sete selos. La Oveta de Dio abri la prima, cual clama per cuatro esentes cual veni sur cavalos blanca, roja, negra, e pal (o un jala verdin).

Ante la Reformi, la comentas tipal e plu influente de la Libro de Revelas ia pensa ce sola un cavalor ia monta esta cuatro cavalos, ci ia es Cristo mesma. La mesma idea ia es mostrada en desinias luminante medieval, e a pos par alga comentores moderna, plu resente par Emanuel Swedenborg, un teolojiste svensce en 1766.

An si teolojistes e otras difere sur la cavalor prima, la cavalores ia es comun videda como representa concista o peste, gera, famion, e moria. La interprete es ce la cuatro cavalores es encargada con un apocalise sur la mundo como indicantes de la ariva de la Judi Final de tota umanas. Ce la cuantia es cuatro es importante en alga modo, car cuatro es sinifiante en numerolojia biblial.

Alga cristianes interprete la cavalores como un predise de un turba futur, en cual multe persones va mori como la resulta de desastres multiple. Los es la primas en un serie de judis representada par la selos, cuando Dio va judi umania e dona a los la posiblia de repenti ante mori.

Otra teolojistes crede ce la cavalores sinifia desastres cual va aveni pos cuando Joan ia ave sua revelas, spesial a la Impero Roman. On pote vide ce alga avenis pote coresponde a la cavalores: geras interna e con la partianes , crises de la economia, e periodos de famiones e pestes. Plu jeneral, la cavalores representa la declina e cade de la Impero Roman.

La descrive de la cavalores de la Apocalise pote es trovada en la Libro de Revelas, capitol 6, linias 1 a 8:

1. E me ia vide cuando la Oveta ia abri un de la selos, e me ia oia, car lo ia es la ruido de tona, un de la cuatro animales dise - "Veni e vide".

2. E me vide, e regarda un cavalo blanca; e el ci ia monta sur lo ia ave un arco; e un corona ia es donada a el e el vade a ante per concista.

3. E cuando el ia abri la selo du, me ia oia la animal du dise - "Veni e vide".

4. E un otra cavalo vade a estra, cual ia es roja; e potia ia es donada a el cual ia monta su lo per estra la pas de la tera afin los ta debe mata lunlotra; e un spada grande ia es donada a el.

5. E cuando el ia abri la selo tre, me ia oia la animal tre dise - "Veni e vide". E me ia regarda un cavalo negra; e el ci monta sur lo ia ave du balansas en sua mano.

6. E me ia oia un vos en la media de la cuatro animales dise - "Un mesura de trigo per un sentim, e tre mesuras de orzo per un sentim; e no feri la olio e la vino.

7. E cuando el ia abri la selo cuatro, me ia oia la vose de la animal cuatro dise - "Veni e vide".

8. E me ia vide, e regarda un cavalo pal; e la nom de el ci ia monta lo ia es Moria, e enferno segue el. E potia ia es donada a los sur un cuatri de la tera, per mata con la spada, e con fama, e con mori, e con la animales de la tera.