Cultur solutrean
La tecnolojia de la cultur solutrean es un stilo sofisticada de fabrica utiles de petra de foco en la paleolitica, sirca 20,000 a 15,000 aec. Locas solutrean ia es trovada en Frans, Espania, e Portugal.
La nom deriva de la loca Roca de Solutré, en Frans sentral. Lo ia es descrovreda en 1866 par un jeolojiste e paleontolojiste franses Henry Testot-Ferry. Lo es aora conservada como la Parc archeologique et botanique de Solutré. La cultur ia es nomida par Gabriel de Morillet per descrive la nivel du de sua sistem de cronolojia de cavas, sequente la cultur mousterian. La trovadas inclui utiles, perletas, e spinos de oso, e arte preistorial.
La fabrica de utiles solutrean ia usa tecnicas nova e no rediscovreda per milenias. La solutrean ave puntos bifasal refinada fabricada con redui percusante e flocinte par presa en loca de la talia plu cru. Flocinte ia es fada con bastetas de corno de servos, lenio dur, o marteles de petra mol. Esta metodo ia permete la fabrica de agetas delicata de petra de foco per crea lansias e flexas lejera, an con spinas e insertadas. Puntos grande per lansias, raspadores con sua borda no a un lado ma a la fini, cotelas e sieras, etc, ia es produida. Oso e corno ia es ance usada.
Trovas de restas de animales inclui cavalos, renos, mamutes, leones de cava, rinoseros, ursos, e uros. Descovres ia ance aveni en la cavas de Les Eyzies e Laugerie Haute en Frans e la Creswell Crags en England. La cultur ia aveni prima en Espania, e desapare de la arcivos de arceolojia sirca 15,000 aec.
Alga teorias ia formi sur la idea ce la solutreanes ia viaja ultra la mar Atlantica a la costa este de America Norde, par segue la jelo cual esiste plu sude alora ca aora en un modo simil a lo de la Inuit moderne. Esta idea ia es intendeda per esplica la comensa (parente subita) de la punto Clovis de la americanes orijinal, cual ave similes con la puntos solutrean, e la esiste de la aplogrupo de y ADN R1 e de mt ADN X2, ambos comun en Europa ma no en Asia este. La acorda entre spesialistes sujeste ce esta teoria no pote es suportada: La crusi de la Atlantica alora ta es cuasi nonposible, e la esplica no es nesesada pos la descovre de tipos simil en Sibir, cual pote es un parte de la popla cual ariva en America Norde de la ueste par Beringia.