Dermatite

Dermatite es un grupo de maladias cual resulta en la inflama de la pel. Esta maladias es marcada par pruri, pel roja, e un eruta. En casos de dura corta, on pote ave bulas peti; en casos de dura longa, la pel pote spesi. La area de la pel afetada pote varia de peti a la corpo intera.

dermatite de la mano

On ave tipos variosa de dermatite, como dermatite atopica, dermatite de contata irital, dermatite de contata alerjial, dermatite statical, e dermatite seboreal. La nom "dermatite" es comun usada per un forma acuta, e "eczema" per la forma cronica. Alga persones prefere usa la du parolas como egal.

La causa esata de dermatite es comun nonclar. Casos pote inclui un combina de irita, alerjia, e reenvia debil par la venos. La tipo de dermatite es jeneral determinada par la istoria de la person e la loca de la erutas. Per esemplo, dermatite de irita aveni comun sur la manos de persones ci moiada los frecuente. Dermatite de alerjia aveni con esposa a un alerjen, cual causa un reata ipersensosa en la pel.

Trata de dermatite atopica es tipal con idratantes e cremas steroide. La cremas debe jeneral es de un fortia media a alta e es usada per min ca du semanas a un ves, car efetos ladal pote aveni. Antimicrobiales pote es nesesada si on ave sinias de infeta. Dermatite de contata es tipal tratada par evita la alerjen o iritante. Antiistaminales pote aida con dormi e per decrese rasca en la note.

Dermatite es estimada como afetante 245 milion persones global en 2015. Dermatite atopica es la tipo la plu comun e jeneral comensa en enfantia. En la SUA, lo afeta sirca 10 a 30% de persones. Dermatite de contata es du veses plu comun en femas ca mases. Dermatite de contata alerjial afeta sirca 7% de persones a alga punto en tempo. Dermatite de contata irital es comun, spesial entre persones ci ave careras cual esposa los a la iritante; la persentos no es clar.