Despersonali de femes

Ata como tu trata umania, en sua propre person o en la person de un otra, nunca sola como un modo de ateni un fini, ma sempre como, a la mesma ora, un fini. - Imanuel Kant

En filosofia sosial, despersonali es la ata de trata un person como un cosa e no un person. Seguente Martha Nussbaum, un person es posible despersonalida si un o plu de la cualias seguente es aplicada a el:

1. Tratante un person como un util per la usa par un otra;
2. Tratante la person como sin autonomia o autodetermina;
3. Tratante un person como sin ajentia o ativia;
4. Tratante la person como intercambiable con otra cosas o persones;
5. Tratante un person como sin bordas integral e nonviolable, como alga cosa cual on es permeteda per rompe o entre par forsa;
6. Tratante un person como el pote es poseseda, comprada, o vendeda;
7. Tratante un person como on no debe atende a sua esperias o emosias.

Rae Helen Langton ia ajunta tre plu cualias:

1. Redui a corpo - trata la person como no plu ca sua corpo o partes de sua corpo;
2. Redui a apare - trata la person xef como el apare a la sensas, spesial belia o nonbelia;
3. Silensi - trata la person como silente, sin la capasia de parla.

Seguente la teoria, despersonali un fema ave resultas importante: lo pote afeta sua sania psicolojial e pote condui a la developa de ansia, depresa, malfunsiona sesal, e sindromes de come.

Anunsia

La usa de seso la plu temprana conoseda en un anunsia

Anunsias ia tipal mostra femes (e omes) en roles stereotipal (pe, como un fem de casa, secretor, curor, instruor, madre, etc), en anunsias moderne, femes es mostrada en roles estra la tradisional. Ma anunsia moderne stereotipi femes, ma en modos plu sutil, como asentua sua belia sesal. Femes es plu comun la ojetos de sesisme: en anunsias con omes, los es tipal plu corta e poneda en la fondo, mostrada en posas "femin", e jeneral con un grado plu alta de "esibi de corpo".

Oji, alga nasiones (pe la nasiones scandinavian) ave leges contra despersonali sesal en anunsia, an si nudia no es proibida e nudia pote es usada per anunsia un produida si los pertine a la produida. Sol Olving, xef de la Forum Kreativt de Noria, esplica "Tu pote ave un person nuda mostrante un jel o cream per la dux, ma no un fem en un bicini drapeda sur un auto". Otra nasiones continua proibi nudia, ma proibi ancora despersonali de femes, como la proibi en Israel de posteres cual mostra umilia sesal o presente un person como un ojeto otenable per usa sesal.

Pornografia

Un ator pornografial

Femiste Catharine MacKinnon razona ce pornografia contribui a sesisme par despersonali femes e mostra los en roles sedente. El sujeste ce pornografia redui femes a utiles. El e Andrea Dworkin lia pronografia con despersonali par razona:

Nos define pornografia como la suordina grafical e direta sesal tra imajes e parolas cual ance inclui (i) femes presentada como desumanida como ojetos, cosas, o benes sesal; o (ii) femes presentada como ojetos sesal ci joia umili o dole; o (iii) femes presenteada como ojetos sesal esperinte plasir sesal en viole, insesto, o otra atacas sesal; o (iv) femes presentada como ojetos sesal liada, taliada o mutilada o contusada o ferida fisical; o (v) femes es presentada en posas de sede sesal, sclavin, o esibi; o (vi) partes de la corpos de femes, incluinte ma no limitada a vajinas, senos, o gluteos, es esibida en un modo en cual femes es reduida a acel partes; o (vii) femes es presentada como penetrada par ojetos o animales; o (viii) femes es presentada en senes de degrada, umilia, feri, tortura, mostrada como mugrosa o inferior, sanguinte, contusada, o ferida en un contesto cual mostra esta situas como sesal.

Alga persones oposada a pornografia, incluinte MacKinnon, acusa la produi de pornografia como envolvente coerse fisical, psicolojial, e economial de la femes ci presenta e modeli se en lo. Oposantes de pornografia ance acusa lo de presenta un imaje contorseda de relatas sesal e reinforsa mitos sesal; lo mostra femes como desponable continual e volente partisipa en seso a cualce ora, con cualce person, su la dirije de la otra, respondente positiva a cualce demanda. Pornografia desensi persones de la desiras de la fem (o om), e de sua doles, e de la moralia de trata un person como un cosa.

Defendores de pornografia e ativistes contra sensura (incluinte femistes seso-positiva) razona ce pornografia no afeta seria un person mental sana, car la vidor pote distingui entre fantasia e realia. Los sujeste ance ce ambos femes e omes es egal despersonalida en pornografia, e la femes representada pote ance usa la omes en acel modo.

Prostitui

Un prostituida en un bordel

Prostitui es la comersiali de relatas sesal, en cual seso es intercambiada per paia. Car prostituidas es comun despersonalida, sua autonomia es perilida. On ave un idea comun ce, car los vende seso, prostituidas acorda con tota formas de contata sesal. Como un resulta, prostituidas fasa proportios plu alta de viole e ataca. Estas es comun iniorada par autorias.

En multe nasiones, prostitui es cominada par bordeles o otenores, ci declara comun ce los ave diretos de propria de la prostituis ci los domina. Esta promove la conseta ce prostituis es sin ajentia. Esta es leteral la caso en sclavia sesal.

Carole Pateman scrive ce:

Prostitui es la usa de la corpo de un fem par un om per sua propre sasia. On suposa no desira o sasia de la prostituida. Prostitui no es un mutual intercambia de la usa de corpos, ma la usa uniladal de la corpo de un fem par un om intercambiada per mone.

Media

Alga eruditas crede ce la representa de grupos demografial pote manteni e an disturba disposas e condui a acel grupos. Seguente Susan Douglas:

De la desenios de 1990, multe de la media ia deveni a suprarepresente femes como ia ateni completa susede en la profesas, e como ia ateni egalia sesal con omes, e como ia ateni un nivel de susede finansial e comforta joiada xef par la damas sofisticada, crostada con Tiffany, de Laguna Beach.

Esta imajes pote es danante, spesial a femes e minorias razal e etnical. Per esemplo, un studia de femes african-american ia trova ce los senti ce representas en la media de sua grupo reinforsa comun la stereotipos de estas como imajes multe sesal e idealida de femes african-american plu magra e con pel plu pal, cual los descrive como despersonalinte.

Referes

• Nussbaum, Martha (1995). "Objectification". Philosophy & Public Affairs. 24 (4): 249–291.
• Rae Langton (February 15, 2009). Sexual Solipsism: Philosophical Essays on Pornography and Objectification, 1st Edition. Oxford: Oxford University Press. pp. 228–229
• Holmes, Stephanie (25 April 2008). "Scandinavian split on sexist ads". BBC News.
• MacKinnon, Catharine (1987). Feminism Unmodified: Discourses on Life and Law. Cambridge, MA: Harvard University Press. p. 147.
• Morgan, Robin. (1974). "Theory and Practice: Pornography and Rape". In: Going Too Far: The Personal Chronicle of a Feminist. (1977). Random House.
• Jeffries, Stuart (April 12, 2006). "Stuart Jeffries talks to leading feminist Catharine MacKinnon". The Guardian. London.
• Douglas, Susan J. (2010). The Rise of Enlightened Sexism. New York, NY: St. Martins Press.
• Pateman, Carole (1988). The Sexual Contract. Google Books.