Determinantes en elefen

Articles e otra determinantes es usada plu en lfn ca en otra linguas romanica (o en engles). En un lingua cual un gramatica tan isolinte como lfn, lo es importante per inclui un modo de distingui nomes de otra roles en un frase. Per linguas cual usa articles, la modo de usa es aprendeda temprana en enfantia e ia deveni cuasi instintal. Ma per parlores de linguas sin articles, la usa es a ves un misterio.

La modo la plu simple per deside entre la e un es par demanda a se mesma si on ta prefere usa acel ante la nom, o la numero un, con la idea ce lfn esije ce on usa un de los. Si acel sona oce, usa la (o un otre determinante defininte); si un sona plu bon, usa un (o un otra determinante nondefininte). Si la nom es plural, e acel no sona bon , on pote usa no article, o un cuantia.

Si on no usa la (o un de sua sustituis), cual indica ce un nom va segue pronto, on debe ajunta un (o un sustitui per un) o depende de la -s de pluralia per indica la nom.

La e otra determinantes defininteEdita

La es la article la plu fundal en lfn. Lo sujesta ce nos (a min la escutor e la parlor) conose la cosas de cual los discute. Lo es posible direta ante los, o lo ia es indicada resente, o es suposada como conoseda jeneral. On pote usa lo con cuasi cualce nom comun, singular o plural.

Nomes propre no aseta la. Los no nesesa cualce article, car la letera major indica sua identia.

Otra parolas pote es sustituida per la:

  • Esta - lo sinifia "la cosa asi";
  • Acel - lo sinifia "la cosa ala";
  • Cada - lo refere a la individuas en un totalia, e la nom es sempre singular;
  • Ajetivos de posese - mea, nosa, tua, vosa, sua.

Tota e ambos es ance defininte, ma vade ante cualce otra determinantes.

Un e otra determinantes nondefininteEdita

Si la nom refere a cualce cosa no familiar a la parlor e la escutor, on usa un. Un es ance la parola per un cuantia, ma lo ance es usada per indica la nondefininte. Lo es sempre usada con nomes singular, natural. On nom plural, sin un determinante defininte, es ance nondefininte.

Otra parolas pote es usada en loca de un:

  • Alga - lo es un varia asentuante de un, o asentua un nom plural;
  • Cualce - simil a alga, ma ajunta la idea ce lo no importa cual o cuanto.

Cuantias ance pote es usada en loca de un, ma pote ance segue otra determinantes a supra:

  • Numeros - du, tre, cuatro...;
  • Multe e poca;
  • Plu, min, e sola (cual pote ance segue otra cuantias).

Otra parolasEdita

  • Otra - pote segue otra determinantes;
  • Mesma - segue la o otra determinantes defininte;
  • Tal - segue un, otra determinantes nondefininte, o usada con un nom plural.

Bon e mal no es determinantes, ma pote presede direta ante la nom, pos cualce determinantes.

Nomes de masaEdita

Nomes de masa es alga spesial: los no nesesa cualce determinantes, si on vole refere a la masa como un clase: acua es nesesada per vive. Con la o otra determinantes defininte, la nom refere alora a alga cuantia restrinjeda: la acua en acel vitro. Lo pote ance deveni plural: nos ave multe acuas diferente. Con un o otra determinantes nondefininte (o la plural ma sin la), la nom refere a cuantias ma nonspesifada: un acua colorida es strana.

Nomes astrata, como nos derivada de nomes e ajetivos par ajunta -ia, e infinitivas (verbos atante como nomes), ance no nesesa un determinante.