Diabete (tipo 1)
Diabete tipo 1 es un forma de diabete melito en cual poca o no insulin es produida par la pancreas. Ante trata, esta resulta en alta niveles de glucosa (zucar de sangue) en la corpo. La sintomes clasica es urini frecuente, plu sidi, plu fami, e perde de pesa. Plu sintomes pote inclui vide neblosa, fatiga, e sani lenta de feris. Sintomes developa tipal tra un periodo corta de tempo. La maladia comensa tipal en enfantes e adultes joven.
La causa de diabete 1 no es conoseda, ma on crede ce lo envolve un combina de fatores jenetical e ambiental. Risca plu grande inclui seliaca e familia con diabete tipo 1. La mecanisme su diabete envolve un destrui autoimunial de la selulas beta produinte insulin en la pancreas. Diabete es diagnoseda par esamina la cuantia de glucosa o emoglobina glicada (HbA1C) en la sangue. Diabete tipo 1 pote es distinguida de tipo 2 par proba per la presente de autoanticorpos.
On no ave un modo per preveni diabete tipo 1. Trata con insulin es nesesada per survive. Terapia con insulin es normal par [injeta] mera su la pel, ma pote ance es par un pompa de insulin. Un dieta diabetica e eserse es partes importante de maneja la maladia. Si no tratada, diabete pote causa multe complicas. Complicas de comensa relativa rapida inclui cetoasidose diabetica e coma iperosmolal. Complicas de dura longa inclui maladias de cor, atacas serebral, fali de renes, ulseras a la pedes, problemes de la nervos (neuropatia) e dana a la oios (retinopatia). Plu, complicas (ipoglisemia) pote aveni de glucosa basa causada par usa esesente de insulin.
Diabete tipo 1 composa un proportio estimada de 5-10% de tota casos de diabete. La cuantia de persones afetada no es conoseda, an si on estima ce sirca 80,000 enfantes developa la maladia anial. En la SUA, la cuantia de persones afetada es estimada a 1-3 milion. Frecuentias de la maladia varia vasta con sirca un caso nova per 100,000 en Asia este e America latina, e sirca 30 casos nova per 100,000 en Scandinavia e Cuait.