Dinastia Yuan
La dinastia Yuan (xines: 元朝; pinyin: Yuán Cháo) ia es la impero o dinastia renante instituida par Hubilai Han (acc Kublai Khan), la xef de la clan mongol de Borjigin. Lo segue la dinastia Song e presede la dinastia Ming. An si la mongoles ia rena teritorios (incluinte Xina norde de nosa eda) per desenios, lo no ia es asta 1271 ce Hubilai Han ia proclama ofisial la dinastia en la stilo tradisional de Xina, e la concista no ia es completa asta 1279 cuando la dinastia Song sude ia es vinseda en la batalia de Yamen. Sua rena ia es, par esta tempo, isolida de la otra hanias mongol e ia controla la plu de Xina e areas sirca lo, incluinte Mongol. Lo ia es la dinastia prima de xines non-han per rena tota de Xina. Alga de la imperores mongol de la Yuan ia aprende la lingua xines, ma otras ia usa sola mongol e la scrive phags-pa.
La dinastia Yuan ia es la hania renada par la susedores de Monh Han pos la divide de la Impero Mongol. En la istorias ofisial de Xina, la dinastia Yuan ia ave la "Autoria de Sielo". La dinastia ia es instituida par Hubilai Han, ma el ia pone la nom de sua avo Txingis Han a la arcivos imperal como la fundor ofisial de la dinastia como Taizu, sua nom de templo. En la "Proclama de la Nom Dinastial", Hubilai ia nomi la dinastia nova como la Yuan Grande, e ia reclama la susede de dinastias presedente de la "Tre Monarcas e Sinco Imperores" (eroes cultural de Xina antica), a la dinastia Tang.
En ajunta a Imperor de Xina, Hubilai Han ia ance reclama la titulo de "Han Grande", suprema supra la otra hanias: la Hania Txagadai, la Manada Oro, e la Ilhanan. Ma an si la proclama de supremia par la imperores Yuan ia es reconoseda par la hanes de la ueste, sua obedi ia es sola par nom, e cada ia continua sua propre developa separada.
Hubilai Han ia promove crese comersial, siensal, e cultural. El ia suporta la mercatores de la rede de comersia de la Via de Seda par proteje la sistem postal mongol, construinte infrastrutur, furninte prestas cual finansia caravanes comersial, e coraji la sirculi de mone paper. La "Pax Mongolica", pas mongol, ia permete la sperde de tecnolojias, benes, e cultur entre Xina e la ueste. Hubilai ia estende la Canal Grande de Xina sude a Daidu en la norde. La rena mongol ia es de la mundo su Hubilai: el ia bonveni visitores stranjer a sua corte, como la mercator venezian Marco Polo, ci ia scrive un reporta sur Xina multe influente sur la popla european.
Ma la anios final de la dinastia ia es marcada par lutas, famiones, e amargia entre la popla. La susedores de Hubilai ia perde, tra tempo, tota influe supra la otra hanias mongol, e la mongoles esterna ia vide los como tro xines. Gradal, los ia perde sua influe en Xina ance. La renas de la imperores Yuan plu tarda ia es corta e marcada par conspiras e competes. No plu interesada en governa, los ia deveni separada de la popla e la armada, e Xina ia es rompeda par nonacorda e turbosia. Criminores ia viole la impero sin interfere par la armadas debil de la Yuan.
De la desenio 1340 tarda, popla en la campania ia sufri de desastres natural frecuente, como secias, inondas, e la famiones cual segue, e la asentia de governa efetosa par la governa ia resulta en un perde de suporta. La dinastia Yuan ia dura asta 1368, cuando la dinastia Ming ia defeta la fortes Yuan. Seguente acel, la renores, ci ia continua vide se como la susedores de Txingis Han, ia retira a sua propre teritorios en Mongol e ia continua rena como la dinastia Yuan norde. Lo es segueda par la dinastia Ming.
