Distruba mental

Un disturba mental, ance nomida un maladia mental, es un motif de condui o pensa cual causa un angusa sinifiante o un mali de la funsiona personal. Un disturba mental ance es marcada par un disturba medica sinifiante en la cognisio, la regula emosial, o la condui de un individua, frecuente en un contesto sosial. Tal disturbas pote aveni como episodios singular, pote es persistente, o pote es reveninte-remetente. On ave multe tipos diferente de disturba mental, con sinias e sintomes cual varia multe entre disturbas spesifada. Un disturba mental es un aspeta de la sania mental.

La causas de disturbas mental es frecuente nonclar. Teorias asorbe trovas de un varia de campos. Disturbas pote es asosiada con rejiones o funsionas spesifada de la serebro. Un profesal de sania mental, como un psicolojiste clinical, un psiciatriste, un curor psiciatrica, o un laboror sosial clinical, diagnose o evalua disturbas, usante metodos diversa como probas psicometral, ma frecuente dependente de oserva e demanda. On debe considera credes cultural e relijiosa, e ance normas sosial, cuando on fa un diagnose.

Servis per disturbas mental es usual fundida en ospitales psiciatrica, clinicas de consulta esterna, o en la comunia. Profesales de sania mental furni tratas. Elejables de trata comun es psicoterapia o medisin psiciatrica; cambias de stilo de vive, intervenis sosial, suporta par pares, e autoaida es ance elejables. En un minoria de casos, on pote ave deteni o trata nonvolente. On ia mostra ce programes de preveni redui depresa.

En 2019, disturbas mental comun tra la mundo ia inclui: depresa, cual afeta sirca 264 milion persones; dementia, cual afeta sirca 50 milion; disturba bipolal, cual afeta sirca 45 milion; e scizofrenia e otra psicoses, cual afeta sirca 20 milion persones. Disturbas de developa neurolojial inclui la disturba de manca de atende con iperativia, la disturba de la spetro de autisme, e descapasia inteletal, de cual la comensa aveni temprana en la periodo de developa. Stigma e discrimina pote ajunta a la sufri e descapasia asosiada con disturbas mental, gidante a promoves sosial diversa cual atenta boni la comprende e defia la esclui sosial.