Dominos
Dominos es un familia de juas cual usa telias retangulo con un linia dividente sua fas en du finis cuadro. Cada fini es marcada con un cuantia de puntos o sin un punto. La dorso de la dominos es nondistinguida. La grupo de dominos tradisional es composada de 28 dominos, con tota combinas de puntos entre zero e ses.
La nota la plu temprana de dominos es de la dinastia Song de Xina, trovada en la testo "Avenis pasada en Wulin" par Zhou Mi (1232-1298). Dominos moderna ia apare prima en Italia en la sentenio 18, ma como la dominos xines ia developa a la jua moderna no es conoseda. Lo es posible ce misionores italian en Xina ia trae la jua a Europa.
La nom "domino" es probable de la similia a un tipo de vestes fantasin de carnavales de Venezia, comun composada de un roba con capo negra e un masca blanca.
En la "Ensiclopedia de mil tesoros", Zhang Pu (1602-1641) ia descrive la jua de pone dominos como pupai. Juas tradisional en xina inclui Tien Gow, Pai Gow, Pai Gow, Che Deng, e otras. La colie de 32 dominos en Xina ia es construida per representa cada fas de du dados lansada, donce los no ave duis sin puntos. Los inclui duplis de alga lansas de dados, e divide la dominos entre du familias: militar e sivil. Dominos xines es ance plu longa ca dominos european tipal.
La varia la plu fundal de dominos es per du juores. La 28 telias es miscada con sua fas a su, e forma la reserva. Cada juor prende sete telias de la reserva. Los es poneda sur sua borda, afin la juor pote vide sua propre dominos ma no pote vide la valua de los de la otra juor. Cada juor pote vide cuanto telias resta en la colie de sua oposor.
Un juor comensa par pone un de sua telias sur la table. Esta telia comensa la linia de la jua, con cual la valuas de duples visina debe acorda. La juores alterna estende la linia de jua con un telia a un de sua du finis. Si un juor no pote pone un telia, el debe continua trae telias de la reserva asta el pote pone un telia a la linia. La jua fini cuando un juor gania par pone sua telia final, o cuando la jua es blocida can nun pote jua. Cuando un juor gania, el reseta la conta de puntos cual resta en sua oposores telias.
Plu comun, si algun pone un telia con la mesma numero a cada fini ("duples"), el pone lo a traversa de la linia. Alora, juores pote comensa nova linias de la du finis, o continua la linia esistente.