Edda prosal
La Edda prosal, ance conoseda como la Edda plu joven o la Edda de Snorri, es un obra de leteratur en norsce vea, scriveda en Island en la sentenio 13 temprana. Lo ia es probable scriveda par la erudita, parlor-de-leges, e istoriste Snorri Sturluson, sirca 1220.
Lo comensa con un prefasa sur cosmolojia norsce, la panteon de dios e divas norsce, e la mitos. Esta es segueda par tre libros distinguida: la Gyfaginning (sirca 20 mil parolas), la Skaldskaparmal (sirca 50 mil parolas), e la Hattatal (sirca 20 mil parolas). Snorri intende la obra como un testo per aprende, cual pote capasi poesistes e lejores islansce per comprende la sutilias de poesia aleterante, e per comprende la sinifia su la multe kenningar (composadas usada per descrive dios, otra persones, locas, e cosas variosa) usada en la poesia de la scaldas (scrivores e narores de poesias o baladas norsce).
En la prefasa, la dios nordica es descriveda como gerores umana de Troia, ci ia parti de la site pos sua cade. Seguente la Edda, esta gerores ia coloni Europa norde, do los ia es asetada como res divin per sua cultur e tecnolojia superior. Rituos conduida a sua locas de entera dejenera a cultos pagan, cual cambia los a dios.
La Gylfaginning ("la engana de Gylfi") descrive la crea e destrui de la mundo de la dios nordica, e otra aspetas de mitolojia norsce.
La Skaldskaparmal ("la lingua de poesia") es composada de un dialogo entre Aegir, un dio asosiada con la mar, e Bragi, un dio de la skaldes, en cual la mitolojia de la norsces e la natur de poesia es discuteda. La orijina de alga kenningar es presentada e esplicada. Bragi alora comensa discute lingua poesial en detalia, spesial la heiti, la conseta de parolas poesial cual es nonperifrastente e sistemi los.
La Hattatal ("lista de formas poesial") es la parte final. Lo es composada tota par Snorri. Usante sua propre composadas, lo dona esemplos de la formas poesial usada en la poesia norsce. Snorri ia es prescrivente e no sola descrivente: el ia ordina la formas, comun notante ce la poesistes plu vea no ia segue sempre sua regulas.