Esistentialisme

Esistentialisme es la studia filosofial cual comensa con la person individua - no sola la person pensante, ma la person atante, sentinte, vivente. lo es asosiada xef con alga filosofistes european de la sentenios 19 e 20 ci, estra sua diferes, comparti la crede en acel comensa de pensa filosofial.

Scrivores fundal per esistentialisme: Kierkegaard, Dostoevsci, Nietzsche, e Sartre

An ce la valua xef de esistentialisme es comun asetada como libria, sua virtua prima es autenticia. En la pensa de la esistentialiste, la punto de comensa de un person es marcada par cual ia es nomida "la disposa esistentialiste", pd un senti de desorienta, confusa, o preteme cuando fasante un mundo cual apare sin sinifia o asurda. Multe esistentialistes ia regarda ance ce la filosofias tradisional o academial, en stilo e contenis, es tro astrata e distante de esperia umana real.

Soren Kierkegaard es jeneral videda como la filosofiste esistentialisme, an si el no ia usa la terma. El ia proposa ce cada individua - no sosia o relijio - es cargada con dona sinifia a vive e con vive lo con pasion e sinsera, pd "autentical"

Esistentialisme ia deveni popular en la anios seguente la Gera Mundal 2, un resulta de Jean-Paul Sartre lejente Martin Heidegger en cuando en un campo de prisonores de gera, e influente forte multe campos estra filosofia, incluinte teolojia, drama, arte, leteratur, e psicolojia.

Esiste presede esense

Sartre ia razona ce un proposa sentral de esistentialisme es ce "esiste presede esense", pd ce la considera xef per individuas es ce los es vera individuas - atante autonom, consensosa, e encargada - e no seguente la eticetas, roles, stereotipos, definis, o otra categoriasen cual individuas pote es cabeda. La vive real de la individua es lo cual pote es nomida sua "esense vera" en loca de on ave un esense acaso o atribuida par otras. Donce, umanas, tra sua propre consensa, crea sua propre valuas e determina la sinifia de sua vive.

Asurdia

La idea de la asurda conteni la idea ce la mundo no ave sinifia estra la sinifia cual nos dona a lo. Esta manca de sinifia inclui ance la nonmoralia o nonjustia de la mundo. Esta idea pote es mostrada clar en la modo en cual lo oposa la perspetiva tradisional de la relijios abramal, cual aserta ce la intende de vive es la completi de la comandas de Dio, e lo es cual dona sinifia a la vive. Per vive en asurdia nesesa rejeta un vive cual trova o xerca un sinifia per la esiste umana, car esta no pote es descovreda.

Fatia

Fatia es la aspetas de sua esiste cual es donada e no pote es cambiada. Per esemplo, sua pasada es un parte de tu, ma no defina tu. On debe es consensa de lo, e debe aseta lo como un fato, ma on es ancora libre per usa lo en la prosede de vive. En la mesma modo, sua corpo, sua jenetica, sua familia, sua tradisiones, sua nasionalia, etc, tota es donada a tu. Ma la rejeta o nega de lo constitui un stilo de vive nonautentica. Per esemplo, on ave un corpo umana, cual no permete ce on core plu rapida ca sona; on debe aseta lo e continua tua vive an con la fatia de esta restrinje.

Autenticia

Multe scrivores esistentialiste asentua la idea de esiste autentica. Esta envolve la idea ce on debe "crea se" e alora vive en acorda ce esta se-mesma. Cual es intendeda par autenticia es ce, en ata, on debe ata como se mesma, e no como "tota de nos ata en esta modo" o "me jenes nesesa ce me ata en esta modo" o "me es un om, e donce me debe ata un un modo mas" o "persones como me no ata en acel modo". La ata autentica es un cual es en acorda con sua libria (con considera de fatia). On debe ata de sua valuas personal cuando on debe eleje (e no acaso, ance), donce on aseta ce tu es encargable per la ata.

Ansia

Ansia e preteme esistential es un terma cual es comun a multe pensores esistentialiste. Jeneral, lo es videda como un senti negativa cual veni de la esperia de libria e encargablia. La esemplo arcetipal es la esperia ce on ave cuando on sta sur un falesa a do on no sola teme cade, ma ance preteme la posible de lansa se de lo. En esta esperia ce "no cosa restrinje me", on senti la asentia de cualce cosa cual predetermina sua ata, e on esperia sua libria. Ansia es la persepi subita de la manca de sinifia, comun en cuando on completa un taxe cual pare a la comensa como ave sinifia intrinsica, sola per descovre plu tarde ce lo manca sinifia.

Despera

Despera, en esistentialisme, es definada como la perde de espera. Plu esata, lo es la perde de espera como un reata a la rompe en un o plu de la cualias cual defina sua se-mesma o identia. Si un person es investida en esente un cosa spesifada, como un gidor de un bus o un sitada prestijiosa, e subita trova ce esta identia es menasada, el ta es trovada normal en un state de despera - un state sin espera. Per esemplo, un cantor ci perde sua capasia per canta pote despera si el no ave cualce cosa per suporta el per sua identia. El trova se sin la capasia per es lo cual ia defina sua esiste - un crise esistential.

La importa de ansia, despera, e otra emosias comun, ia resulta en multe psicoterapistes usante la filosofia de esistentialisme como un modo en cual un pasiente pote comprende sua problemes. Par revela la libria (e encargablia) ce la pasiente posese per dirije sua vive, la psicoterapiste pote alora continua en aida la pasiente en crea un vive sasiante.