Fema

La parola fema refere ultima a animales cual ave ovos e la sistem de reprodui per crea enfantes. La parola es ance usada per plantas con sistemes simil de reprodui. Nota bon ce alga femas no ave ovos o pote crea enfantes, ma ave la materia jenetical como otra femas. Estas es ance femas.

Entre umanas, la parola "fema" es ance usada per alga persones ci regarda se como femas, an si fisical o jenetical los es mas.

Simbol

Un simbol usa comun per representa la seso fema es ♀, un sirculo con un crus peti a su. Como diseda par Schott, la persepi la plu stable es ce la simbols mas e fema "es derivada de peti en scrive elinica de la nomes elinica de la planetas de Thouros (Marte) e Phosphoros (Venus). Esta derivas ia es trasada par Renkama, ci ia mostra como on pote muta leteras elinica a la simboles grafica de mas e fema cual es ancora reconoseda oji." On ia corti Thouros a θρ, e Phosphoros a Φ, ambos de estas ia es en la scrive de mano de alcimicistes, donce los ia es alga diferente ca leteras elinica moderna. Esta cortis ia es petida a la simboles moderna.

Determina de seso

La seso de un organisme spesifada pote es determinada par alga fatores. Estas pote es jenetical o ambiental, o pote cambia natural tra la vive de un organisme. An si la plu de spesies con sesos mas e fema ave individuas cual es o mas o fema, animales androjine ave la sistemes de reprodui de e mases e femas.

Determina jenetical

La seso de la plu de mamales, incluinte umanas, es determinada jenetical par la sistem de determina de seso XY, en cual mases ave un cromosoma X e un Y, en cuando femas ave du cromosomas X. En reprodui, la mas contribui o un sperma X o un sperma Y, en cuando la fem contribui sempre un ovo X. Un sperma Y e un ovo X produi un mas, en cuando un sperma X e un ovo X produi un fema. Avias, retiles, e alga insetos e otra organismes ave la sistem de determina de seso ZW, en cual mases ave du cromosomas Z, e femas ave un cromosma Z e un cromosoma W. Membros de Hymenoptera, per esemplo formicas e abeas, es usual mas cuando los es aploide, e femas e alga mases steril es deploide.

Determina ambiental

La jovenes de alga spesies crese a mas o fema par causa de la state de sua ambiente local, pe la seso de multe tipos de crocodiles es influeda par la temperatur de sua ovos. Otra spesies (pe la gobio), cuando los es adultes, pote cambia sua seso per responde a constrinjes local de reprodui (pe un manca de mases).