Fobia sosial

Fobia sosial (ance conoseda como sindrom de ansia sosial) es un sindrom de ansia marcada par un cuantia sinifiante de teme en un o plu situas sosial, causante multe angusa e un descapasia de funsiona en a min alga partes de vive dial. Esta temes pote es stimulada par regarda par otras. Persones con un fobia sosial jeneral teme evaluas negativa de otra persones.

Timidia es un cualia tipal de persones con un fobia sosial

Sintomes fisical inclui comun roji esesente, sui esesente, trema, palpitas, e nausea. Balbuta e parla rapida pote ance es presente. Atacas de panica pote ance aveni con teme e descomforta intensa. Alfa sufrores pote usa alcol o otra drogas per redui sua teme e retarda en avenis sosial. Lo es comun per sufrores de fobia sosial per automedici en esta modo, spesial si los no es diagnoseda, tratada o ambos. Esta pote resulta en alcolisme, problemes de come, o otra tipos de malusa de drogas. Fobias sosial es refereda a veses como maladias de oportunas perdeda, do persones fada elejes de vive per evita sua maladia. Seguente la gidas de ICD-10, la criteria xef de diagnose de fobia sosial es la teme de es la foca de atende, o teme de condui se en un modo cual va es embarasante o vergoniante, e sintomes de anxia e evita. Metodos de gradi pote es usada per diagnose fobias sosial e la severia de ansia.

La trata xef per fobias sosial es terapia de pensa e condui (en engles: cognitive behavioral therapy o CBT). La terapia es desiniada per cambia la abituas de pensa e reata a situas cual causa ansia. Medisines es recomendada sola per los ci no desira terapia clinical. Medisines prescriveda inclui antidepresas variosa: la inibador spesifada de recatura de serotonina (ISRS, o engles SSRI), la inibador de recatura de serotonina e norepinefrina (IRSN, o engles SNRI), e la inibador de monoamina osidasal (IMAO, o engles MAOI). Otra medisines inclui la blocinte de resetadores beta (BRB) e la benzodiazepina.