Fonolojia de elefen

Spele e pronunsiaEdita

AlfabetaEdita

A su es la alfabeta de elefen en sua forma latina e cirilica, e con sua formas major en AFI:

Latina a b c d e f g h i j l m n o p r s t u v x z
Cirilica а б к д е ф г х и ж л м н о п р с т у в ш з
Afi [a] [b] [k] [d] [e] [f] [ɡ] [h] [i] [ʒ] [l] [m] [n] [o] [p] [r] [s] [t] [u] [v] [ʃ] [z]
Nomes a be ce de e ef ge hax i je el em en o pe er es te u ve ex ze

Alga fanes de elefen ia crea modos per usa un varia de otra sistemes de scrive, como elinica, arabi, ivri, hangul, e nion.

VocalesEdita

Vocales en elefen (a, e, i, o, e u) es pronunsiada como en espaniol. Car efelen ave sola sinco vocales, varias en pronunsia no causa multe problemes. En AFI:

vocal anterior vocal posterior
vocal cluida i u
vocal media e o
vocal abrida a

La diftongos es ai [ai], au [au], eu [eu], e oi [oi]

ConsonantesEdita

La plu de la consonantes es pronunsiada como en engles, franses, deutx, espaniol, etc, con alga esetas:

  • c e g es sempre "dur" - [k] e [g],
  • j es pronunsiada como en franses - [ʒ],
  • x es pronunsiada como engles sh o franses ch - [ʃ].

En AFI:

bilabial labio-
dental
alveolal pos-
alveolal
palatal velal glotal
esplodente p b   t d     k ɡ  
fricante   f v s z ʃ ʒ     h
nasal m   n     ŋ1  
vibrante     r        
prosiminte w2   l   j3    
1 La letera n ante c e g es pronunsiada [ŋ]; -ng a la fini de un parola es ance pronunsiada [ŋ].
2 La letera u es pronunsiada [w] entre du vocales e a la comensa de un parola ante un otra vocal; cu e gu ante un vocal es pronunsiada [kw] e [gw].
3 La letera i es pronunsiada [j] entre du vocales e a la comensa de un parole ante un otra vocal.

La leteras k, q, w, e y pote es usada per nomes propre de otra linguas, e es pronunsiada [k], [k], [u, w], e [i, j], en ordina. Simil, alga leteras en la alfabeta cirilica no es usada esta nomes propre.

Nota: La pronunsia de elefen es flexable, si on trova lo difisil. Per esemplo:

  • on pote pronunsia e como [ei] o [ɛ], e o como [ou] o [ɔ], si tu prefere;
  • on pote omete h si on trova ce lo es difisil;
  • on pote pronunsia j e x como [dʒ] e [tʃ];
  • on pote pronunsia "scrive" e "strada" (etc) como "escrive" e "estrada";
  • on pote cade la consonante prima en parolas de elinica, como "psicolojia" o "pterodatilo".

AsentuaEdita

Asentua no es multe importante en elefen, ma on pote usa esta sujestes:

Natural, la monosilabas ave un asentua trivial:
  • te
Si la parola fini en un consonante o un diftongo, la asentua senta sur la silaba ultima:
  • abeon
  • cacau
En la plu de otra casos, la asentua es sur la silaba ultima min un:
  • casa
  • maio
  • sangui
  • idea
  • tio
Si un parola (de plu ca du silabas) fini con ia, ie, io, ua, ue, o uo,* la asentua es sur la silaba ultima min du:
  • varia
  • rituo
La plural con -s o -es no altera la asentua orijinal de la parola:
  • casas
  • tios
  • ideas
*Nota ce estas es fasil recordada: i/u, segueda par a/e/o.

En alga casos, on pote reteni un asentua trovada en la linguas romanica o linguas orijinal:

  • Alga parolas cual fini con -u, per esemplo, pote ave sua asentua a la silaba final: bambu, barbecu, cacatu, cangaru, cazu, didjiridu, manitu, marabu, menu, ragu, tabu, tiramisu, xampu;
  • Alga parolas peti ave ance sua asentua a la silaba final: ala, asi, agu, aha, ami, axi, axu, ura;
  • Parolas cual fini con -ica (como los cual fini con -ia) pote ave la asentua a la silaba ante la sufisa (matematica, psicotica, alcimica, etc.
Nota ce parolas composada ave la asentua a la parola xef: para-rio, su-via, tre-tia, dise-no, etc.

Leteras majorEdita

Jeneral on usa un letera major a la comensa de la parola prima en un frase (pd pos un periodo o a la comensa de un paragraf)

On usa un letera major ance a la comensa de un nom propre. Cuando un nom propre conteni plu ca un parola, on dona un letera major a cada parola – ma no a parolas minor como la e de:

  • Persones real o imajinada, e ance animales e cosas personida
    • Maria, San Paulo, Barack Obama, Jan de Hartog, Seniora Braun, Oscar de la Renta, Mickey Mouse
  • Organizas (pe: companias, asosias)
    • Ikea, Nasiones Unida, Organiza Mundal de Sania
  • Areas political (pe: nasiones, statos, sites)
    • Frans, Atina, Site de New York, Statos Unida de America
  • Locas jeografial (pe: rios, mares, lagos, montanias)
    • la Alpes, Rio Amazon, Mar Atlantica
  • Leteras de la alfabeta
    • E, N

Ma con titulos de operas de arte e leteratur, on dona un letera major sola a la parola prima de la titulo (e a cualce nomes propre cual apare):

  • Un sonia de un note de mediaestate
  • La frates Karamazov
  • Tocata e fuga en D minor

A veses, como en avertis, on usa leteras major per ASENTUA parolas o frases intera.

Elefen usa leteras minor do alga linguas usa leteras major:

  • Dias de la semana
    • lundi, jovedi
  • Menses
    • marto, novembre
  • Festas e avenis simil
    • natal, ramadan, pascua
  • Sentenios
    • la sentenio dudes-un
  • Linguas e poplas
    • catalan, xines
  • Cortis comun
    • lfn, pf

Estra estas, la usa de leteras major o minor resta con la usor.

FonotaticaEdita

La formas de parolas comun en elefen es constrinjeda par alga regulas.

Du esemplos de la mesma vocal (como aa) no pote sta a lado de lunlotra, estra cuando esta es la resulta de ajunta un prefisa: “reenvia”, “coopera”. En esta casos, on pronunsia ambos vocales.

La segue ei es normal trovada sola en parolas cual ave un prefisa cual fini con e (como preistoria e reincarne) e en parolas cual ave un sufisa cual comensa con i (como fein e veida). La pronunsia normal de ei es como du vocales separada, ma on pote dise [ej] o [e] si on prefere.

Elefen no usa consonantes duple.

Tipal, elefen no usa vocales duple. En casos rara, uu- per [wu-] e ii- per [ju-] es permeteda.

Tipal, estra la diftongos, du vocales no pote segue lunlotra. La esetas:

  • si u es usada como un consonante, pd [w]: u - a/e/i/o
  • si i es usada como un consonante, pd [j]: i - a/e/o/u
  • cuando ajunta un prefisa cual fini con un vocal ante un radis cual comensa con un vocal, en cual casos la du vocales es pronunsiada separada:
    • reenvia
    • coopera
    • reajusta
    • reinventa

Alga parolas ave la combina ae (pe "trae"), cual es pronunsiada como du vocales separada.

Cuando un sufisa ta crea un mal segue de vocales, on sutrae la vocal du de la segue:

  • ambiente + -iste → ambientiste
  • anestese + -iste → anestesiste
  • comedia + -iste → (comediiste) → comediste

Esta no aplica, en la plu de casos, per parolas de un silaba:

  • bu + eta → bueta
  • fa + or → faor

A la comensa de un silaba, on permete sola la grupos seguente de consonantes:

r l
p pr pl
b br bl
t tr
d dr
c cr cl
g gr gl
f fr fl
sp spr spl
st str
sc scr scl

Alga parolas, adotada de elinica, conteni combinas de consonantes ultra los normal asetable, pe:

  • ps - psicolojia
  • pt - pterodatilo
  • ft - diftongo

A la fini de un silaba, on permete un vocal o sola la consonantes seguente, e un vocal debe sta direta ante los:

  • la fricantes: -f, -s, -x
  • la nasales: -m, -n, -ng (final)
  • la aprosimantes: -l, -r

Per divide un parola en partes, on debe fende los entre un asetable fini seguente par un asetable comensa:

  • encontrante = en-con-tran-te
  • mostrablia = mo-stra-bli-a
  • instinto = in-stin-to

Nota: Esta regulas no aplica a la nomes propre, e a alga parolas tecnical, internasional, o cultural.