Abri la menu xef
Un mapa de la Impero Roman en la sentenio du, incluinte "Magna Germania"

Germania ia es la terma roman per la rejion jeografial en Europa norde-sentral abitada xef par popla germanica. Lo ia estende de la Rio Danubio e la Rio Main en la sude, a la Mar Baltica, e de la Rio Reno en la ueste a la Rio Vistula en la este. La partes incluida en la Impero Roman formida du provinses de la impero: Germania Inferior a la norde (Nederland sude, Beljia, e Deutxland ueste) e Germania Superior a la sude (Suiz, Deutxland sude-ueste, e Frans este). La orijina de la nom "Germania" no es serta, ma lo ia es conoseda per la tempo de Cesar, e es probable usada orijinal par la galos. Multe linguas, incluinte engles e rusce, usa ancora un nom simil a Germania per la nasion moderna, ma ala, los nomi se deutx, e sua nasion Deutxland.

Germania ia es abitada xef par tribus germanica, ma ance inclui alga tribus de celtas, balticas, scitianes, e plu tarda slavicas temprana. La misca de popla ia cambia tra tempo par asorbe e spesial par migra. La elinicas antica ia nota prima la tribus en la area. Plu tarda, Julio Cesar ia scrive sur la tribus germanica como gerosa e un menasa a Galia roman, e Multe batalias ia aveni entre la romanes e la tribus nativa. Tacito ia scrive la reporta la plu completa de Germania cual survive ancora.