Gyo Fujikawa
Gyo Fujikawa (3 novembre 1908 - 26 novembre 1998) ia es un desinior american e un autor de libros per enfantes. Un creor produosa de plu ca 50 libros per enfantes, sua obras es cuasi sempre reprimida e ia es traduida a 17 linguas e publicida en 22 nasiones. Sua libros la plu popular - "Babies" (bebes) e "Baby Animals" (bebes animal) - ia es vendeda plu ca 1.8 milion copias en la SUA. Fujikawa es reconoseda per es la desinior la plu temprana de libros cual ia inclui enfantes de multe razas en sua obras, ante cuando lo ia deveni comun.
Gyo Fujikawa ia nase en Berkeley, California, a jenitores japanes, Hikozo e Yuko Fujikawa. La nom mas, Gyo, ia es per un imperor xines ci sua padre ia amira.
Gyo Fujikawa ia move a Los Angeles per atende la Chouinard Institui de Arte en 1926, cuando el ia reseta un suveni per studia. Ala, el deveni ami con la dansor japanes Michio Ito e multe nisei* scrivores e artistes. Pos gradua e spende un anio en Japan, el ia es un instruor a Chouinard de 1933 a 1937. El ia es empleada par la Walt Disney Compania en California como un artiste de anunsias. Pos acel, el ia move a New York en 1941. El ia evita la encampa de la japanes e japanes-americanes de la costa ueste en la Gera Mundal Du car el ia es en New York. Ma sua familia ia spende la gera en la campo a Rohwer, Arkansas. De 1943 a 1951, el ia es empleada par la ajenteria de anunsias farmasial William Douglas McAdams.
En 1951, Fujikawa ia deveni un desinior autonom, produinte 12 desinias per la covres de Children's Digest e otra jornales, e sirca 5 anios plu tarda ia es invitada par editor per enfantes Debra Dorfman a Grosset & Dunlap per crea imajes per "A Child's Garden of Verses" (un jardin de poesias de enfantes) par Robert Louis Stevenson. Esta ia es sua libro prima per enfantes, en 1957. "Babies", la libro prima scriveda e desiniada par Fujikawa en 1963, ia es un de la libros per enfantes cual usa carateres multi-razal, un cualia cual continua tra tota sua obras.
Pos la susede de "A Child'a Garden of Verses", Fujikawa ia deveni un de la artistes prima ci ia ave un contrata cual inclui royalties, paia per la cuantia de libros vendeda, e alora ia refusa labora estra ce sua publiciste ia acorda.
La libros par Fujikawa ia es reprimida tra la mundo. Sua libros la plu popular - "Babies", "Baby Animales", "A to Z Picture Book", and "Oh! What a Busy Day!" - sin fali ia representa un esemplo de enfantia felis e detaliosa. Sua desinias joiosa resta dulse e nostaljial, sin deveni tro zucarin. Sua depintas de enfantes es reconosable per fases ronda e felis, con jenos roja e oios simple. Discutente sua respeta per sua lejores, el ia dise:
"En desinia per enfantes, lo cual me gusta la plu es la atenta a sasia la demanda constante en la dorso de mea mente - esce esta imaje va catura la imajina de un enfante? Cual me pote fa per boni lo plu? Esce lo aida en presente la nara? Me es distante de es susedosa (cualce cosa lo sinifia), ma me es tan grasiosa a lejores peti ci ia trova "alga cosa" en cualce libro de mea."
Fujikawa ia mori a 26 novembre 1998 en New York Hospital. An si el ia es prometeda a la eda de 19, el no ia sposi o ave sua propre enfantes.
- "Nisei" es un parola japanes per un person de ci sua jenitores es de Japan.