Hania Oro
La Hania Oro (mongol: Алтан Орд, Altan Ord) ia es un hania orijinal mongol e plu tarde turces (tatar), comensante en la sentenio 13 ec como la parte norde-ueste de la Impero Mongol. Con la frati de la impero pos 1259, lo ia deveni un hania separada.
Pos la mori de Batu Han (la fundor de la Hania Oro) en 1255, sua dinastio ia flori per un sentenio asta 1359. La potia de la hania ia culmina en la rena de Uzbeg (1312–1341), ci ia adota Islam. La teritorio de la hania a esta tempo ia inclui la parte la plu grande de Europa este, de la Urales a la rio Danubio, e ia estende a este, distante en Sibir. En la sude, la paises de la hania bordida a la mar Negra, la Caucasos, e la teritorios de la dinastia mongol en Persia, conoseda como la Ilhania.
La hania ia sufri desordina political interna comensante en 1359, ante lo reunida per un tempo corta (1381–1395) su Tohtamix. Ma, pronto pos la invade en 1396 de Timur, fundor de la Impero de Timur, la Hania Oro ia comensa rompe en hanias tatar peti, cual deveni min potiosa rapida. Pos 1466, lo ia es simple refereda como "la hania grande". En sua teritorios, multe hanias turcica peti ia developa. Esta lutas interna ia permete ce un stato-vasal norde - Muscovia - pote devesti se de la "iugo tatar" a la Fronti grande a la rio Ugra en 1480. La Hania Crimsce e la Hania Cazac, la restas final de la Hania Oro, ia survive asta 1783 e 1847, en esta ordina.