La Impero Osmanan (turces osmanan: دَوْلَتِ عَلِيّهٔ عُثمَانِیّه‎ Devlet-i Aliyye-i Osmâniyye) ia es un impero fundida en 1299 par Osman 1 en la norde-ueste de Anatolia. Istorial conoseda par sua abitantes e la mundo este como Rum, e conoseda en Europa ueste como la Impero Turces, ia es un stato cual ia controla multe de Europa sude-este, Asia sude-ueste, a Africa norde entre la sentenios 14 e 20. Lo ia es fundida a la fini de la sentenio 13 en Anatolia norde-ueste en la vila de Sogut (moderna provinse Bilecik) par la xef tribal de la turces Oguz, Osman 1. An si a la comensa, la dinastia ia es turcica, lo ia es tota persianida en sua lingua, cultur, leteratur, e tradisiones. Pos 1354, la osmanis ia vade en Europa e, con la concista de la Balcanes, la beylik Osmanan ia es cambiada a un impero transcontinental. La osmanis ia fini la Impero Bizantian con la concista en 1453 de Constantinopoli (Istanbul) par Mehmed 2 "la concistor".

Impero Osmanan, 1683
Mehmed la concistor, par Gentile Bellini, 1480

En la sentenios 16 e 17, a la culmina de sua potia su la rena de Suleiman 1 "la gloriosa", la Impero Osmanan ia es un impero multinasional e multilingual cual ia controla la plu de Europa sude-este, partes de Europa sentral, Asia sude-ueste, partes de Europa este e la Caucasos, Africa norde e la Corno de Africa. A la comensa de la sentenio 17, la impero ia conteni 32 provinses e multe statos vasal. Alga de esta ia es plu tarde asorbeda en la Impero Osmanan, e otras ia es donada tipos variosa de autonomia tra la sentenios.

Con Constantinopoli como sua capital e controla de la teras sirca la basin Mediteraneo, la Impero Osmanan ia es a la sentro de interatas entre la mundos este e ueste per ses sentenios. An si algas ia crede ce la impero ta declina pos la mori de Suleiman, la impero ia continua sua economia, sosia, e militar forte e flexable tra la sentenio 17 e multe de la sentenio 18. Ma, pos un periodo longo de pas de 1740 a 1768, la sistem militar osmani ia deveni min forte ca los de la Impero Habsburg e la Impero Rusian. La osmanis ia sufri alga defetas sever en la sentenios 18 e 19 temprana, cual ia causa los per comensa un prosede completa de reformi e moderni conoseda como la Tanzimat. Donce, tra la sentenio 19, la impero ia deveni multe plu potiosa e organizada, an si lo ia perde plu teritoria, spesial en la Balcanes, do alga statos nova ia emerji.

En la sentenio 20, la impero ia alia con Deutxland, per evita la isola diplomatal cual ia contribui a sua perdes teritorial resente, e donce lo ia junta en la Gera Mundal 1 a la lado de la Potias Sentral. An si la impero ia es capas de reteni sua teritorios en la gera, lo ia comensa luta con desacorda internal, spesial con la Revolui Arabi en sua teritorios arabi. En esta periodo, la governa osmani ia jenoside contra la haiarenes (sirca 750,000 matada), elinicas pontica (348,000-900,000), curdis (13,000–40,000), asirianes (5,000-6,000). La governa turces no aseta la realia de esta jenosides, ma la evidentes es nondisputable.

La defeta de la impero e la ocupa de parte de sua teritoria par la Potias Aliada pos la Gera Mundal 1 ia resulta en la frati de la imperi e la perde de sua teritorios de Asia sude-ueste, cual ia es divideda entre Britan e Frans. La Gera de Autonomia Turces contra la alia ocupante ia resulta en la emerji de la Republica de Turcia en Anatolia e la aboli de la monarcia osmani.