Istoria temprana de Deutxland
La conseta de Deutxland como un rejion spesial en Europa sentral ia deveni de la jeneral roman Julio Cesar, ci ia refere a la area nonconcistada a este de la Rio Reno como Germania, e en esta modo ia distingui lo de Galia (aora Frans), cual el ia concistada.
Umanas antica edita
La descovre de la mandibula de Homo heidelbergensis en 1907 ia afirma la presentia de umanas antica en Deutxland per a min 600,000 anios ante aora. La colie completa de armas per xasa la plu vea sempre trovada en la mundo ia es escavada de un mina de carbon en Schöningen, Sasonia basa. Entre 1994 e 1988, oto lansas de lenio de 380,000 anios ante aora ia es trovada.
En 1856, la osos fosilida de un spesies umana estinguida ia es trovada en un cava de calcario en la vale Neander prosima Düsseldorf. La fosiles, aora conoseda como 40,000 anios de vea, ia es reconoseda e la cualias publicada en 1858 par Hermann Schaaffhausen. La spesies ia es nomida Homo neanderthalensis, pd la neandertal.
La restas de la presentia de umanas moderna temprana de la paleolitica ia es trovada en alga cavas en Swabia inclui scultas de la ivor de mamutas, entre la arte la plu vea, e alga flautas de oso de avias e ivor de mamutas, la strumentos musical la plu vea en la mundo. La figur Löwenmensch ("om-leon") es 40,000 anios de vea, e la Venus de Hohle Fels es 35,000 anios, la plu vea nondisputada de mundo.
Cultures temprana edita
La grupos prima de cultivores temprana, diferente de la xasores-coliores nativa, cual ia migra a Europa ia deveni de un popla en Anatolia ueste a la comensa de la periodo neolitica, entre 10,000 e 8,000 anios aa. La colonistes de la cultur de vasos cordida, cual ia sperde tra la planos fertil de Europa sentral en la neolitica tarde ia es indoeuropeanes. Los ia ariva en la cor de Europa sirca 4500 anios aa.
Per la eda de bronze tarde, la cultur de campos de vasos (sirca 1300 a 750 aec) ia repone la cultures de vasos campanin, la unetice, e la Tumulo en Europa sentral. La cultur Hallstatt, cual ia developa de la cultur de campos de vasos, ia es la cultur xef de Europa ueste e sentral de la sentenio 12 a 8 aec, e en la eda de fero temprana (sentenio 8 a 6 aec). La popla ci ia adota esta cultur ia es videda como celtas. Como la celtas es relatada a la cultur de campos de vasos no es serta. Ma sentros de cultur celta ia developa en Europa sentral en la eda de bronze tarde (sirca 1200 aec a 700 aec). Algas, como la Heuneburg a la Danubio, ia crese a sentros importante de cultur de la eda de fero, e ia manteni vias comersial a la Mediteraneo. En la sentenio 5 aec, la istoriste elinica Herodoto ia nota la esiste de un site celta a la Danubio - Pirene, cual istoristes ia atribui a la Heuneburg. Comensante sirca 700 aec, popla germanica de Scandinavia sude e Deutxland norde ia estende se a sude e ia repone gradal la popla celta en Europa sentral.
La tribus germanica edita
.png)
La etnojenese de la tribus germanica resta nonserta. Ma lo pare ce lo ia es un prosede continuante cual ia aveni en la eda de bronze. De sua casas en Scandinavia sude e Deutxland norde, la tribus i estende a sude, este, e ueste en la sentenio prima aec, e ia ateni la tribus celta de Galia e la cultures iranian, baltica, e slavica de Europa sentral e este.
Fatos sur la istoria temprana de la tribus es rara. Rexercores ia depende sur la arcivos de la relatas de la tribus con la romanes, e alga sujestas linguistica e arceolojial, e plu resente, arceojenetica. En la media de la sentenio prima aec, Julio Cesar ia erije la pontes prima supra la Reno en sua campania en Galia, e ia condui un grupo militar a la teritorios de la tribus germanica local. Pos alga dias e sin contata con la soldatos germanica, ci ia retira a la interna, Cesar ia reveni a la ueste de la Reno. La tribu sueba, su xef Ariovisto, ia concista, sirca 60 aec, teras de la tribu galo edui a la ueste de la rio. Intendes per popli la rejion con colonistes germanica de la este ia es forte oposada par Cesar, ci ia lansa ja sua intendes per domina tota de Galia. Cesar ia vinse supra la armada sueba en 58 aec en la Batalia de Vosges, e ia forsa ce Ariovisto per retira ultra la Reno.
Colide con la Impero Roman edita
Imperor Augusto ia vide la concista ultra la Reno e la Danubio no sola politica stranjer normal, ma ance nesesada per combate la avansas germanica en un Galia ancora rebelante. Un serie de fortreses e sentros comersial ia es creada longo la du rios. Alga tribus, como la uba, ia alia se con Roma e ia adota la cultur avansada roman. En la sentenio prima ec, lejiones roman ia dirije campanias estendeda en Germania Magna, la area norde de la Danubio alta e este de la Reno, atentante la domina de la tribus variosa. La ideas roman de maneja, impostas, e strutur legal ia es frustrada par la asentia intera de un infrastrutur. La campanias de jeneral roman Germanico, per esemplo, ia es cuasi tota casos de masacras frecuente de campaniores e saca jeneral. La tribus ia continua manteni sua identias evitante.
En 9 ec, un liga de tribus su la xef de la ceruscos, Arminio, ci ia es familiar con la taticas de la romanes, ia defeta un fortia grande roman en la Batalia de la Foresta Teutoburg. Seguente, Roma ia deside per crea un borda permanente a la Reno e Danubio, e asteni de plu avansas teritorial en Germania. Per 100 ec, la frontera longo la Reno e Danubio, e la Limes Germanicus ia es secur. Alga tribus germanica ia vive su rena par la romanes sude e ueste de la borda, como descriveda en Germanica, par Tacito. Esta paises representa la statos moderna de Baden-Württemberg, Baiern sude, Hesse sude, Saarland, e Renoland. Osteraic ia formi la provinses de Noricum e Retia. La provinses de Germanica Inferior (con sua capital a Colonia Claudia Ara Agrippinensium, moderna Coln) e Germania Superior (con sua capital a Mogontiacum, moderna Mainz), ia es instituida formal en 85 ec, pos campanias longa e dolosa, e controla militar ia es restrinjeda a la paises longo la rios.
La sentenio 3 ia vide la emerji de alga tribus germanica grande: alamanes, francos, bavaros, catos, sasones, frisis, sicambros, e turingos. Per la sentenio 3, la popla parlante linguas germanica ia comensa migra ultra la limes e la frontera de la Danunio. Alga tribus grande - visigotos, ostrogotos, vandales, burgundas, langobardas, sasones e francos - ia migra e ave sua parte en la diminui de la Impero Roman e la muta de la impero vea.
Cristiania ia es introduida a Germania. Trier ia es construida en la rena de Constantino 1 (rena 306 - 337 ec). Per la fini de la sentenio 4, la hunes ia invade Europa este e sentral. La aveni ia inisia la Periodo de Migras. La rena par la hunes sur un teritorio vasta en Europa ia dura asta la mori de Dengizic, la fio de Atila, en 469 ec). La situa ia cambia cuando un federa de tribus nomida la francos ia concista Galia e alora la otra tribus germanica de la ueste, per crea un sentro nova de Europa ueste: la Impero Roman Santa.
Tribus germanica edita
Ajetivos elefen per alga de la tribus germanica, con traduis engles. Nota ce un membro de la tribu ave la mesma forma como la ajetivo, e ce la nom de la tribu es simple la plural (pe "el ave un vaso cimbro", "el es un cimbro", "sua tribu es la cimbros"). E nota ce popla moderna ave tipal nomes diferente (pe "frisis es un tribu antica", "la frisces es un popla moderna"):
- alaman - alleman
- alan - alan
- anglo - angle
- bavaro - bavarian
- burgunda - burgundian
- cato - chatti
- cerusco - cherusci
- cimbro - cimbrian
- cuado - quadi
- dan - dane
- erman - hermion
- franco - frank
- frisi - frisii
- gauta - geat
- gepido - gepid
- goto (visi-, ostro-) - goth
- visigoto - visigoth
- ostrogoto-ostrogoth
- herul - heruli
- iuto - jute
- langobarda - lombard
- marcoman - marcoman
- sason - saxon
- sicambro - sicambrian
- sueba - suebian
- suion - suion
- teuton - teuton
- turingo - thuringi
- vandal - vandal