Istoria temprana de la suomi

La istoria temprana de la suomi ia comensa sirca 9000 aec en la fini de la periodo glasial final. La cultures de la eda de petra ia es la cultur Kunda, la cultur de vasos petenida, la cultur de vasos cordida, la cultur Kiukainen, e la cultur Pöljä. La eda de bronze ia comensa en Suomi a sirca 1500 aec, e la eda de fero ia comensa a 500 aec e ia dura asta 1300 ec.

La eda de petra

Paleolitica

Si suportada, la loca arceolojial la plu vea en Suomi ta es la Cava de Lupo en Kristinestad, Ostrobothnia. Esta loca ta es la sola loca ante-glasial (pd neanderthal) asta aora descovreda en la paises nordica, e es de sirca 125,000 anios a ante.

Mesolithic

La eda glasial final en la area de Suomi moderna ia fini sirca 9000 aec. Comensante alora, popla ia migra ala de la sude e sude-este. Sua cultur ia representa un misca de la cultures Kunda, Butovo, e Veretje. A la mesma eda, Suomi norde ia es abitada par la costa de Noria. La indicas la plu vea confirmada de la colonias umana pos-glasial en Suomi ia es de la area de Ristola en Lahti e de Orimattila, de sirca 8900 aec. Suomi ia es abitada continual a min de la fini de la eda glasial final a la presente. La abitantes pos-glasial la plu temprana ia es probable xef xasores-coliores saisonal. Entre la descovres es la rede de Antrea, la rede per pexa la plu vea conoseda en la mundo, datida radiocarbonal per sirca 8300 aec.

Neolitica

Per 5300 aec, seramica ia esiste en Suomi. La esemplos la plu temprana parteni a la cultur de vasos petenida, reconoseda par sua motifes de decora distinguida. Esta marca la comensa de la periodo neolitica per Suomi, an si susta ia es ancora fundida sur xasa e pexa. Redes de intercambia estendeda ia esiste tra Suomi e Europa norde-este en la milenio 5 aec. Per esemplo, petro focosa de Scandinavia e Lago Onega ia trova sua via a locas arceolojial suomi, en cuando asbestos e steatita de Suomi (pe la area de Saimaa) ia es trovada en otra rejiones. Depintas sur petra - suposada como parte de sistemes de crede xamaniste e totemiste - ia es trovada, spesial en Suomi este (pe Astuvansalmi).

Entre 3500 e 2000 aec, ensircas monumental de petra, conoseda com "Egleses de Jigantes" (suomi: Jätinkirkko) ia es construida en la rejion de Ostrobothnia. La intende de esta ensircas no es sabeda.

Un eglesa de jigantes, de Kastelli

Resente, un escava en Kierikki norde de Oulu longo la Rio Ii, ia cambia la imaje de la cultur neolitica de Suomi. La loca ia es abitada tra la anio intera e ia intercambia estendosa. La cultur Kierikki es ance videda como un su-tipo de la cultur de vasos petenida. Plu de esta loca es escavada anual.

De 3200 aec, o migrores o un influe cultural forte de sude de la Golfo de Suomi ia coloni en Suomi sude-ueste. Esta cultur ia es parte de la cultur de axas de gera, acc la cultur de vasos cordida, cual ia es comun asosiada con la move de la parlores de linguas indoeuropean. La cultur ia pare pratica cultiva e la domada de animales estra Suomi, ma la indicas confirmada la plu temprana de cultiva en Suomi dati plu tarda, sirca la milenio 2 aec. Plu interna, la sosias ia retei sua cultur de xasor-colior.

La cultures de axas de gera e de vasos petenida ia ultima fusa, e deveni la cultur Kiukainen, cual esiste entre 2300 e 1500 aec, e cual es fundal la cultur de vasos petenida con cualias ajuntada de la vasos cordida.

La eda de bronze

La eda de bronze ia comensa en la area pos 1500 aec. La rejiones costal ia es parte de la cultur de bronze nordica, en cuando en la rejiones interna, la influes ia veni de la cultures cual usa bronze de Rusia norde e este.

La eda de fero

La eda de fero en Suomi estende de 500 aec asta 1300 ec, cuando arcivos ofisial e scriveda ia deveni plu comun, la resulta de invades svensce como parte de la crusadas norde en la sentenio 13. Esta article es restrinjeda a la eda ante 575. La produi de fero ia es adotada de cultures visina en la este, ueste, e sude a la mesma tempo cuando la fabricadas de fero ia apare prima. Esta ia aveni cuasi simultan en partes variosa de la pais.

La periodo pre-roman de la eda de fero en Suomi (sirca 500 aec a 1 aec) no ave multe esemplos, ma los trovada sujeste ce la lias cultural a otra paises baltica ia es ja bon fundida. La trovas de Pernaja e Savukoski ia suporta esta idea. Multe de la vilas de la eda es la mesma como los de la neolitica. La plu de la fero de la eda ia es produida a loca.

La periodo roman (sirca 1 ec a 400 ec) ia aveni con un ariva de benes de fero (e otras) emportada, como vitros per vin, culierones, e monetas variosa de la Impero Roman. En esta periodo, la cultur temprana de Suomi ia stabli a la costas, e campos de enteras ia deveni comun. La ricia de la suomi ia leva a un nivel cual la majoria vasta de tesores de oro trovada en Suomi dati a esta periodo.

La periodo de migras (400 ec a 575 ec) ia inclui la estende de cultiva a la interna, spesial en Botnia sude, e la influe cresente de la cultures germanica, incluinte fabricadas como spadas e otra armas, e en costumes de entera. Ma la plu de fero e sua forja ia es fada en Suomi, probable de fero de pantanes.

La periodo Merovian (575 ec - 800 ec) ia introdui un cultur de artisania distinguida, vidable en la decoras orijinal de armas e joalas produida en Suomi. Ma la armas luso de cualia la plu alta ia es emportada de Europa ueste. La enteras cristian prima ia es de la parte tarda de esta era. En la trovas de enteras de Leväluhta, la altia promedia de un om ia es estimada a sirca 158 cm, e de un fem 147 cm. Ma rexerca plu resente ia coreti estas a supra, cual confirma ce la persones enterada ala ia es de la mesma altia promedia com la resta de Europa.

Trovas resente sujeste ce lias comersial de la suomi ia es ja plu ativa en la sentenio 8, con la introdui de arjento en mercatos suomi. La abri de la via este a Constantinopoli tra la arcipelago a la costa sude de Suomi ia trae benes arabi e bizantian a la escavas de la eda.

La trovas la plu temprana de spadas emportada e forjada local ia apare en 500 aec. De sirca 50 ec, on ave indicas de un intercambia de distantias longa plu intensa en Suomi costal. Abitantes ia intercambia sua produidas, probable pelos, per armas e ornas con la balticas e la scandinavianes e ance la popla longo la vias de comersia tradisional a la este. La esiste de enteras rica, comun con armas, sujeste ce on ave un elite de xefes en la partes sude e ueste de la pais. Fortreses de colinas ia sperde tra la plu de Suomi sude a la fini de la eda de fero, e a en la eda medieval temprana. On ave no indicas comun asetada de instituis temprana de statos en Suomi, e la idea ce sites ia developa en sua eda de fero no es jeneral suportada.