Jean-Jacques Rousseau
Jean-Jacques Rousseau (1712-1778) ia es un scrivor e filosofiste franses multe importante. El ia influe edica a aora, filosofia (Kant, Schopenhauer, etc), teoria politica (la Revolui Franses, Karl Marx, etc), e el ia inspira la promove romantica en filosofia, cual alora influe plu tota de estas, e psicolojia, denova.
_-_Google_Art_Project.jpg)
Plu, el es un de la persones la plu colorosa de istoria e, como un regala, el ia dona a nos un autobiografia multe revelante, "La confesas".
El ia nase en Genev, Suiz, en 1712 a Isaac Rousseau, un orolojor, e sua sposa Suzanne Bernard Rousseau. An si el ia es calviniste, Isaac ia es alga nonstable, e ia abandona sua sposa e fio prima, alora reveni per jenita Jean-Jacques, e alora parti denova. La madre de Jean-Jacques ia mori un semana pos cuando Jean-Jacques ia nase, e el ia es elevada par sua tio e tia.
Los ia envia el a un scola abitada en la campania do, el ia dise, el ia aprende "tota la dejetada nonsinifiante cual ia oteni la nom de educa". Ma la esperia ia servi como sua cosa de ama con la vive campanial.
Con 12 anios, el ia reveni a sua tio e tia. Ala el ia es un stajior per un orolojior, en cuando el ia developa du otra cualias personal: La bates constante de sua mestre (en ajunta a los el ia reseta a scola) ia resulta en sua tende per menti e pigria; e sua adolesce ia resulta un developa bizara de romantica. El ta spende multe de sua vive cadente en ama.
Con 16 anios, el ia fuji de sua casa con no mone e no poseses. Un prete ia condui el a baronesa Mme de Warens, un bela de 29 anios ci ia ave un cor mol per perdores e convertores posible. Sua influe ia condui el a converti a catolicisme, an si el no ia es preparada per abandona sua esibisme e sua desira per es palmida par femes bela. El ia entra un seminario en 1729, ma ia es rejetada pronto. El ia developa ultima un relata fisical para-vade con la bela Mme Warens.
Entratempo, el ia pasea tra la campania, frecuente per distantias longa. El ia ama la boscas, montanias, e nature mesma. El ia servi como un ensenior privata nonperiodal de musica e otra sujetos, ma ia spende multe de sua tempo lejente autores de la Lumina. La obras de Voltaire ia introdui el a un adora de Natur amin a sua personalia.
En 1742, cuando el ave 30 anios, el parti per Paris. El ia amini pronto la scrivor political Diderot, ci ia aida el per es empleada como un secretor a la Embasia Franses en Venezia. El ia es enviada a via per sua natur egosa.
En 1746, el encontra e cade en ama con Therese LeVasseur, un lavor e cosor de mente simple. La du ia jenita cuatro enfantes, tota de cual enviada a orfanerias. Recorda ce esta ia es un responde comun a povria en acel eda (de la cade de Roma a la Gera Mundal 2!). El ia repenti de esta plu tarde, ma ia confesa ce el ta es un padre multe misera. Nun duta el sur acel.
El ia labora como un secretor per aristocratas diversa, e ia spende multe tempo composante musica. El ia rescrive un opereta par Voltaire e ia scrive e el. Un contesta de leteratur con un preso de mone ia catura sua atende e, en 1750 el ia gania lo con sua esajo "Discours sur les arts e les sciences", un ataca multe potiosa sur sivilia.
Esta ia es la tempo prima ce nos pote vide sua ideas sur la bonia natural de umanas. E an si nos pensa de el como un pensor de la Lumina, esta tese es vera anti-Lumina, antifilosofia, antirazona, anti-Voltaire, e an antiprimador! La vive bon, el ia dise, es la vive simple de la campaniores. Esta conseta de "a retro a natur" incluida, serta, un idea romantida de natur, e pote es contrastada sever con la natur de junglos e desertos!
1752 ia es un otra anio ativa. El ia scrive sua comedia "Narcisse". Sua opereta "Le devin du village" ia es presentada susedosa a la re. Nonfortunosa, sua maladia - el ia sufri de un varia de problemes dolosa e vergoniante de la vesica - ia para el de un introdui a la re, e lo ia custa el sua pension.
En 1753, un otra compete ia es anunsiada. La esajo par Rousseau, "Discourse sur l'origine et les fondements de l'inegalite parmi les hommes", ia gania la preso e ia es primida du anios plu tarde.
En esta pesa, el ia aseta la nonegalias biolojia, ma ia razona ce on no ave un funda natural per otra nonegalias - economial, political, sosial, o moral! Estas, el ia dise, ia es la resulta de la esiste de propria privata e la nesesa de defende lo con forsa. Umanas es bon, el razona, ma sosia, cual no es multe plu ca la reali de avaria, mali tota de nos.
El ia aseta ce lo no es plu posible ce nos ta abandona sosia sivilida aora. Lo ia deveni, en fato, un parte de nosa natur! La plu bon ce nos pote fa es per condui vives plu simple, con min lusosias e la moralia simple de la evanjelios per gida nos.
En sua article sur economica per la Ensiclopedia, el ia sujeste ce lo ta es aidante si nos ave un imposta gradal sur revenu, un sur lusosias (e no imposta sur nesesas), e educa publica nasional sin custa.
En 1756, el ia move con Therese e sua madre vea a "la Hermitage", un casa peti prestada a el par Mme d'Epinay. Ala el ia scrive un novela (o "romantica") nomida "Julie, ou la nouvelle Heloise", referente a la Heloise famosa, la amada de Abelard. Lo ia deveni, posible, la novela la plu famosa de la sentenio de 1700.
A la mal lado, el ia alieni sua amis con leteras nonplasente, e sua noncortesia a sua beneficor Mme D'Epinay. An sua ami la plu vea, Diderot, ia dise ce Rousseau ia es demente. Anoiante, el ia parti de la Hermitage.
En 1762, Rousseau ia publici "Emile" e "La contrata sosial". La linia prima de La contrata sosial" es la plu famosa: "Umana nase libre, ma es a tota locas en cadenas". La intende de la resta de la libro ia es la descrive de un sosia en cual libria ta es retenida.
"La contrata sosial" es un contrata, asetada como mitolojial, entre persones per sede alga de sua libria per garantia un comunia cual respeta la individua e, en esta modo, reteni tan multe libria posible. Esta idea, combinada con la pensas de Locke sur governa, ia inspira la padres fundinte de la SUA joven.
Ma on debe nota ce, a la fini de la libro, Rousseau sujeste ce mori debe es la puni per cualcun ci, par sua atas, mostra ce los el no teni la valuas comun de la comunia! La Revolui Franses ta mostra plu clar ca la Revolui American como un filosofia como lo de Rousseau pote es un spada con du lados.
Emile ia es plu calma. Lo es un tese sur la eleva de enfantes, de un om ci ia envia sua cuatro enfantes a la orfaneria! An tal, lo ia surprende sua lejores con alga bon sujestes.
Rousseau ia condena tota formas de educa cual usa forsa. En loca, el ia promove educa cual eleva la desplia natural de la potensia de la enfante. Nota ce el dona esta ideas en un eda cuando la plu de persones ia pensa ce, si on no bate tua enfantes con un basto de alga grandia, los ta deveni mal o, a min, regalada. Natur, Rousseau ia dise, es la ensenior xef per la enfante, e libria per esplora es la metodo xef de ensenia.
El ia dise ce la enfante aprende par ajusta gradal a nesesias, e par imita los sirca el. Educa debe es xef moral asta la enfante ave 12 anios, e alora on pote comensa con educa inteletal. Educa relijiosa no es presentada asta 18 anios. En esta modo, la enfante pote developa credes relijiosa razonada, en loca de aseta sin pensa la mitolojia e miracles de otras.
La libro es bela scriveda, ma multe ta dise ce lo es idealiste, cuasi naive. Lo ta deveni un influe grande en Europa, e plu tarde en la SUA. Maria Montessori en Italia, per esemplo, ia fundi multe de sua ideas sur Rousseau. John Dewey en la SUA ia fa la mesma. Lo cual nos nomi aora la educa progresante e aprende par fa deriva de "Emile".
La filosofistes grande de sua eda ia rie a el - ma la eglesores ia es scandalida! La amis de Rousseau ia averti lo e ia coraji el per fuji. En 1762, la parlamento franses ia comanda ce tota copias de "Emile" es confiscada e ardea. Rousseau ia fuji a Suiz, sola per vide ambos sua libros ardeda en Genev calvaniste.
El suplica Frederic la Grande per refuja en Neuchatel. Ala el ia vive, plu strana ca sempre. Ma el ia es alora la idol de femes tra la mundo, e sua publicores ia mendica per plu libros. El ia dona plu, xef en la forma de esajos o leteras a sua criticores.
Ma la ministros local en Neuchatel ia es ance turbada par la scrives, e un sermo local ia resulta en un ataca sur la casa de Rousseau. El e Therese ia move denova, a un caseta sur un isola peti en un lago en Suis. Ma el ia es comandada per parti, cual el ia fa, prima a Strasbourg, alora a England a la invita de David Hume en 1766.
En London el ia es la parla de la site, e cadun ia vole es introduida a el. Ma el ia deveni pronto fatigada par esta e ia demanda de Hume per trova un casa en la campania. Ala, Rousseau, Therese, e sua can Sultan ia carga la patientia de sua ospitor.
Rousseau ia comensa leje articles critical en la jornales brites. Ja alga paranoica, el ia reata a los como los ia es conspira contra el, e an acusa Hume de partisipa en lo. El e Theresa "evita" de England a retro a Frans.
Tecnical, el ia es ancora menasada par aresta en Frans. Ma es ia joia la reseta sua fanes ia dona. Ma el ia teme ancora per sua vive, e donce ia fuji a la campania per vaga anonim. En 1768, el ia sposi, pos tota esta tempo, sua Therese.
Therese ia mendica a el per revade a Paris, e alora los ia move ancora (con nomes falsa). Ala, el ia copia musica per sua mone, e ance ia completa final, en 1770, sua autobiografia.
El ia continua scrive, alga de cual ia es sua obras la plu bela, e alga sua plu paranoica, asta 1778. El ia move a un caseta ofrida par la marci de Girardin, do es ia studia felis la flores local, cuando el ia sufri de un ataca serebral. Therese ia atenta move el a sua leto, ma el ia cade denova e talia sua testa. A la momento ce la marci ia ariva, el ia es mor.
El ia es enterada a la complesa de la marci, e sua tomba ia deveni un loca de peregrinas. El ia es moveda plu tarda a la Pantheon en Paris, e ia es reposada no distante de Voltaire.