John James Audubon (26 april 1785 - 27 janero 1851) ia es un ornitolojiste, naturiste, e artiste. El ia es notable per sua studias estendente, documenti tota tipos de avias american, e per sua depintas detaliosa cual mostrada la avias en sua abitadas natural. Sua obra mestral, un libro de platas colorida titulida The Birds of America ("la avias de America"), es considerada un libro ornitolojial la plu eselente sempre completida. Audubon ia identifia 25 spesies de avias nova.

Depinta de Audubon, par John Syme, 1826
Fasianes galin
Picor de beco ivor
Falcones artica
Perdises virjinian
Becospatulin ros
Corvo american

Audubon ia nase en Les Cayes en la colonia franses de San Domingo (aora Aiti) a la cultiveria grande de cana de zucar. Sua padre ia es teninte Jean Audubon, un ofisior de la marina franses de la sude de Bres, e sua madre ia es un concubina de sua padre, Jeanne Rabine, un limpor de salas con 27 anios de Les Touches, Bres. Los ia nomi la enfante Jean Rabin.

Sua padre ia ave ja un cuantia nonconoseda de enfantes de raza miscada, algas par sua manejor de casa de raza miscada, Catherine Bouffard. Seguente la mori de Jeanne Rabin, la padre ia recomensa sua relata con Bouffard e ia ave un fia con el, nomida Muguet. Bouffard ia ance cura per la bebe Jean.

Tensa cresente en Aiti entre la colonistes e la multe sclavos african, e ia convinse la padre per reveni a Frans, do el ia deveni un membro de la Garda de la Republica. En 1791, el ia organiza ce sua enfantes natural, Jean e Muguet, ta es transportada e enviada a el en Frans.

La enfantes ia es elevada en Coueron, prosima a Nantes, Frans, par la padre e sua sposa franses, Anne Moynet Audubon, ci el ia sposi anios ante sua tempo en Aiti. En 1794, los adotada formal ambos sua enfantes per regulari sua state legal en Frans. Los renomi la xico Jean-Jacques Fougere Audubon, e la xica Rose. Cuando Audubon, con 18 anios, ia embarca en 1803 per la Statos Unida, el ia cambia sua nom a John James Audubon.

De sua dias temprana, Audubon ia ave un ama de avias: "Me ia senti un intima con los... bordante a un panica cual debe acompania mea paseas tra vive."

En 1803, sua padre ia organiza un pasaporto per Audubon per vade a la SUA per evita enscrive en la Geras de Napoleon. Con un asosior, el ia organiza un asosia per sua fios en Mill Grove, Pennsylvania afin los pote ave un fonte de susta. Audubon ia developa febre jala cuando el ariva en la Site de New York. La capitan de la barcon ia pone el en un oteleta manejada par femes cuecer. Los ia cura per Audubon e ia instrui el en engles (incluinte la usa de "thee" e "thou", tipal de cueceres, ma no la popla jeneral). Alora, el viaja con la avocato cuecer de la familia Audubon a la cultiveria de la familia a Mill Grove. Lo ia es 115 ha, locada a la Rieta Perkiomen prosima a Vale Forge.

Ala, Audubon ia encontra la proprior de un cultiveria prosima, nomida William Blakewell, e sua fia Lucy. El ia sposi Lucy sinco anios a pos. La du jovenes ia comparti multe interesas, e comensa spende tempo con lunlotra esplorante la mundo natural sirca los.

Audubon ia comensa studia avias american, e ia es determinada per imaji sua trovas en un modo plu realiste ca la plu de artistes de sua eda. El ia comensa condui la bandi de avias, la prima sur la continente, par lia pesos de lana a la gamas de fibis per divina si los reveni a la mesma nidos cada anio. El ia comensa ance depinta avias, e rejistra sua condui. Pos un cade acaso en un rieta, Audubon ia developa un febre sever. El ia recovre, con Lucy a sua lado.

En 1808, Audubon ia move a Kentucky, e ses menses plu tarda, ia sposi Lucy. An si sua finansias ia es minima, los ia comensa un familia. Los ia ave du fios: Victor Gifford Audubon (1809–1860) e John Woodhouse Audubon (1812–1862); e du fias ci ia mori cuando ancora joven: Lucy a du anios (1815–1817) e Rose a 9 menses (1819–1820). La fios ta aida ultima en la publici de la obras de sua padre, e John ia deveni un naturiste, scrivor, e artiste como sua padre.

Audubon ia viaja a sude sur la Rio Mississippi con sua fusil, caxa de pintas, e sua aidor Joseph Mason, ci ia depinta multe de la fondos de plantas de la depintas de avias par Audubon. Audubon ia intende trova e depinta tota avias de America Norde per publici ultima. El ia viaja a Mississippi, Alabama, e Florida per trova esemplos. El ia refere a sua obra futur como The Birds of America ("la avias de America"). El ia atenta depinta un paje cada dia. Cuando el ia descovre tecnicas nova, el ia deside ce sua obras temprana ia es inferior e refa los.

Lucy ia es la suportor constante per la duple e sua du fios joven. Instruida como un ensenior, el ia condui clases per enfantes en sua propre casas. Plu tarda, el ia es empleada como un ensenior loca en Louisiana. El ia abita con sua enfantes a la casa de un posesor rica de un cultiveria grande, como comun en acel eda.

Con la suporta de sua sposa, en 1826 con 41 anios, Audubon ia prende sua colie cresente de depintas a England. Con leteras de introdui a britanes importante, Audubon ia gania rapida sua atende. La britanes ia adora la imajes de America savaje e sua atraes natural como presentada par Audubon. El ia es asetada sirca England e Scotland, e ia es titulida "la forestor american". El ia recolie reservas sufisinte per comensa publici sua "Avias de America". Es obra grande ia es composada de 435 primidas en sua grandia natural e colorida par mano, produida de platas de cupre gravada. Los ia es primida sur folias de 66 par 99 cm. La obra ia conteni plu ca 700 spesies de avias american.

Re George 4 ia es entre sua multe fanes, e suscriveda per suporta la publica de la libro. La Sosia Real de London ia reconose la ateni par Audubon par eleje el como un membro. El ia es ance elejeda como un membro de la Academia American de Artes e Siensas en 1830. Pos la publici, el ia ave un periodo de difisilias, ma el ia recovre e continua par scrive plu libros popular e depinta plu avias e otra animales.

En 1848, el ia mostra sinias de senilia o posible dementia de cual es aora nomida la maladia de Alzheimer. El ia mori a sua casa familial en Manhattan norde a 27 janero 1851. Audubon es enterada a la jardines de la Eglesa de la Interveni en la Semetero e Mausoleo de la Eglesa de la Trinia a Strada 155 e Broadway en Manhattan, prosima a sua casa. Un monumento grande per onora Audubon ia es erijeda a la semetero, cual es aora reconoseda como parte de la Distrito de Erita Rose de la site de New York.