Juas de volpe
Juas de volpe es un categoria de jua de table per du juores, en cual un juor es la volpe e atenta "come" la gansos o oveas, e la juor oposante direta la gansos o oveas e atentas trapa la volpe, o ateni un destina sur la table. En un otra varia, volpe e canes, la volpe atentas evita le canes. Esta juas es trovada un multe formas: fox and geese (Britan), renard et les poules (Frans), lupo e pecore (Italia), Fuchs und Gänse o Fuchs und Henne (Deutxland), schaapen en wolf (Nederland), riebantablu (Sapmi), rävspel (Sveria), refskák (Island), vlci a ovce (Slovakia), volk i ovtsy (Rusia), bagh-chal (Nepal), etc.
La jua halatafl es conoseda de a min tan temprana como la sentenio 14, e lo es notada en la saga Grettis. Lo probable ia orijina en Scandinavia, como un varia de tafl. En fato, halatafl es ancora juada en Scandinavia con regulas simil a tafl. Halatafl sinifia "table de coda" en norsce vea, e "coda" es suposada como referente a la coda de la volpe. Rävspel, svensce per "jua de volpe", es ancora juada con foras e caviles.
En halatafl, on ave du caviles de un color per la volpes, e 20 caviles de un otra color per la oveas. La jua usa la mesma table como la jua solitar. La gol es ce la oveas ateni un destina spesifada sur la table, un cuadro de 9 foras marcada, e ce la volpes atenta para la oveas de ateni sua destina. La volpes es locida a la comensa a la cantos a la basa de la cuadro de 9 foras. La oveas pote move sola a ante o a lado, ma la volpes pote move en cualce dirije, an a retro. Si un ovea es ante un fora vacua, la volpe debe salta supra la ovea e catura lo, como en damas. La catura es esijeda, e saltas repeteda es esijeda ance. La oveas ia gania si los pote pleni la cuadro de 9 foras.
En la mundo de parlores de engles, un varia plu simple es nomida la volpe e la gansos. La jua ia es la diverti favoreda de Rea Victoria.La gol per la juores es catura la pesos de sua oposor, e la gansos no es restrinjeda en sua moves. La volpe es poneda en la media de la table, e 13 gansos es poneda a un lado de la table. La volpe e la gansos pote move a cualce cuadro vacua sirca lo, ortogonal o diagonal. La volpe pote salta supra la gansos per catura los, como en damas, e saltas repeteda es posible. La gansos no pote salta. Los gania si los ensirca la volpe afin el no pote move. La volpe gania si lo catura un cuantia sufisinte afin la gansos no pote ensirca lo. La jua tradisional con 13 gansos dona la vantaje a la volpe. Varias con 15 o plu gansos es plu egal.
La volpe e la canes es un varia juada sur un table 8 par 8 de damas. Sola la cuadros negra es usada. La cuatro canes es inisial poneda sur la cuadros a un borda de la table; la volpe es poneda sur cualce cuadro a la borda fasante. La gol de la volpe es crusi de un lado a la otra, per ariva a un de la cuadros orijinal de la canes; la gol de la canes es preveni la volpe de ateni sua gol.
La canes move como la pesos de damas, un cuadro diagonal a ante. La volpe move como la re de damas, un cuadro a ante o a retro. La jua no inclui cualce salta, catura, o leva de pesos. La volpe move prima. Lo es trapida cuando lo no pote move a un cuadro vacua. Lo es posible ce du canes trapa la volpe a un borda, estra la borda orijinal de la canes, o an un canto, do un sola can pote trapa la volpe. Cuando un can ateni la linia orijinal de la volpe, lo no pote move plu. Si perfeta juada, la canes ta gania sempre.
Un varia de Srilanca nomida koti keliya ("la jua de la leopardo") es simil a la volpe e la canes. La table es 12 par 12, cuadrosa como un table de damas. Un juor es la leopardo, e la otra es la ses boves. La boves es inisial poneda a un lado de la table sur la cuadros blanca, e la leopardo pote es poneda sur cualce cuadro blanca. LA boves move un cuadro diagonal a ante. La leopardo move un o du cuadros diagonal en cualce dirije diagonal. La goles es la mesma como en la volpe e la canes.