La Du Reunis (两会/兩會, liǎnghuì, en xines) refere a la du asemblas de la legeria de la Republica Popular de Xina, la Comite Nasional de la Confere de Consulta Political de la Popla Xines (中国人民政治协商会议/中國人民政治協商會議, Zhōngguó rénmín zhèngzhì xiéshāng huìyì) e la Congresa Nasional de la Popla (全国人民代表大会/全國人民代表大會, Quánguó rénmín dàibiǎo dàhuì).

La Comite Nasional de la Confere de Consulta Political de la Popla Xines (CCPPX) edita

 
La simbol de la Confere de Consulta Political de la Popla Xines, fundida en 1949.

La Confere (usual cortida como 政协/政協, zhèngxié, o "CPPCC") intende servi como un asembla de colabora entre multe partitos political, organizas popular, e representores de alga sesiones sosial, ma lo funsiona su la gida de la Partito Comuniste de Xina (PCX). Lo es composada con representores de la PCX, la otra partitos de la fronte unida, personas major, eruditas, gidores de organizas comunial, organizas industrial, grupos etnica, e delegadas de Hong Kong, Macau, Taiuan (台湾侨胞), e la popla xines estra la pais (海外侨胞). La membros de la CCPPX es e comunistes e noncomunistes (membros de otra partitos, e membros sin membria partital).  

La reuni nasional en Beijing es nomida la "Comite Nasional". Cada provinsia/munisipa/rejion autonom (省/省级市/自治区), prefetia (州/地级市), contia (县/县级市), site (县辖市) e distrito (区) (estra Hong Kong, Macau e Taiuan) ave ance la reuni local de la CCPPX.  La Comite Nasional reuni cada anio en marto, e la membros servi per sinco anios.

 
La delegadas fema de la prima reuni plen de la CCPPX (1949): Si Liang 史良, Deng Yingchao 邓颖超, Song Qingling 宋庆龄, He Xiangning 何香凝, Ding Ling 丁玲, Cai Chang 蔡畅, Luo Shuzhang 罗叔章, Ceng Xianzhi 曾宪植, Zhang Xiaomei 张晓梅, Xu Guangping 许广平, Li Dequan 李德全.

La CCPPX es sola un organiza de consulta, e sua resolves no ave forsa legal, ma ave influe sinifia en la politica xines. Lo ave 2000 membros, de cual sirca 60 persentos es estra la Partito Comuniste. Sirca 11,5 persentos de la 2000 membros veni de la grupos etnica de minoria.

Istoria de la CCPPX edita

La Comite Sentral de la PCX ia declara la crea de un confere nova de consulta a 30 april 1948 per promove un governa aliada democrata. La prima reuni de la CCPPX ia aveni a 21–30 setembre 1949 en Beiping (aora Beijing) con 662 membros.

La Congresa Nasional de la Popla (CNP) edita

 
La simbol de la Republica Popular de Xina es ance la simbol de la Congresa Nasional de la Popla.

La Congresa (usual cortida como 全人代, Quánréndài, o "NPC") ave 2987 membros (2157 comunistes, e 830 otras), e es la autoria legerial de la republica. La constitui de la Republica Popular de Xina institui la CNP como la autoria statal plu alta de Xina. En realia, la CNP funsiona aproba la proposas de la Partito Comuniste de Xina sin cambias.

La Congresa reuni cada anio en marto, tra du semanas, en junta como la CCPPX, en Beijing. La membros es elejeda en la Asembla Provinsial de cada provinsia, e servi per sinco anios. Ance Hong Kong e Macau pote envia un delegada, como elejeda en un consilio de eleje en la governa de cada rejion. En ajunta, la Armada de Libri Popular (ALP) envia sua propre delegadas, cual composa sirca un desi de la Congresa. 

 
La prima reuni de la Congresa 12 (2013).